Пракурор запатрабаваў па году хатняй хіміі для маладзёнаў, што сарвалі і спалілі чырвона-зялёны сцяг
У судзе Першамайскага раёна Мінска 2 лютага працягнуўся разгляд крымінальнай справы ў дачыненні да мінчукоў Ангеліны Бібік і Мацвея Копача. Іх вінавацяць адразу паводле двух артыкулаў Крымінальнага кодэкса: арт. 370 (Здзек з дзяржаўных сімвалаў) і ч. 2 арт 339 (Хуліганства, здзейсненае групай асоб).
spring96.org
Справу разглядае суддзя Таццяна Ліннік, дзяржаўны абвінаваўца — пракурор Худаешка, паведамляе spring96.org.
Здарэнне адбылося 7 лістапада ўначы. Ангеліна Бібік і Мацвей Копач сарвалі разам з флагштокам на вуліцы Куйбышава чырвона-зялёны сцяг. Паводле следства, яны сталі яго таптаць нагамі, пляваць на яго, а на завяршэнне падпалілі з дапамогай гаручай вадкасці. Гэтыя дзеянні здымаліся на мабільныя тэлефоны іх знаёмымі.
Была нанесеная матэрыяльная шкода ЖРЭА Савецкага раёна. Абвінавачаныя выплацілі яе па 39 рублёў 78 капеек кожны.
На судовым пасяджэнні 2 лютага адбыліся спрэчкі бакоў, выступ дзяржабвінаваўцы, адвакатаў, прагучала апошняе слова абвінавачваных.
Пракурор Худаешка прапанаваў выключыць з абвінавачвання артыкул пра хуліганства, здзейсненае групай асоб і пакінуць толькі здзек з дзяржаўнага сцяга і запытаў па адным годзе абмежавання волі без накіравання ва ўстановы адкрытага тыпу.
Прысуд будзе вынесены 4 лютага.
