Каталіцкі біскуп Антоній Дзям’янка трапіў у рэанімацыю: праблемы з сэрцам
Увечары 28 красавіка кепска стала біскупу Пінскай дыяцэзіі Антонію Дзям’янку, яго тэрмінова шпіталізавалі. Пра гэта «НН» паведаміў канцлер курыі ксёндз Андрэй Рылка.
Антоній Дзям'янка. Фота catholic.by.
«У біскупа праблемы з сэрцам — гэта не навіна. Учора рэзка пачаліся праблемы, можа, нейкія няправільныя лекі. Зрабілі тэст на каранавірус, але вынік адмоўны. Хутчэй за ўсё, гэта звязана з тым, што ў яго былі вялікія перагрузкі ў працы», — адзначае айцец Андрэй.
Ляжыць біскуп у Пінскай бальніцы. Ягоны стан Андрэй Рылка характаразуе, як «невыразны».
Біскупа Дзям’янку забралі ў рэанімацыю, але ўвесь час ён знаходзіцца ў прытомнасці. «У рэанімацыі проста лепшае абсталяванне», — адзначае канцлер курыі.
Антонію Дзям’янку 60 гадоў. З 2012 года ён біскуп Пінскай дыяцэзіі.
Агулам у Беларусі восем біскупаў — у Мінску, Віцебску, Гродне і Пінску.
