Крэмль адказаў на крытыку Лукашэнкі пасля закрыцця мяжы з Беларуссю
kremlin.ru
У Крамлі разлічваюць на разуменне з боку Мінска пасля прынятага Масквой рашэння пра закрыццё мяжы паміж Расіяй і Беларуссю. Пра гэта ў панядзелак, 16 сакавіка, заявіў прэс-сакратар прэзідэнта Расіі Дзмітрый Пяскоў, паведамляе lenta.ru.
Па словах прадстаўніка Крамля, ва ўмовах распаўсюджвання каранавіруса кожная краіна мае права прымаць тыя меры, якія лічыць неабходнымі для гарантавання бяспекі сваіх грамадзян. «Мы разлічваем на разуменне нашых партнёраў, тым больш, нашага бліжэйшага партнёра і саюзніка — Беларусі», — падкрэсліў Пяскоў у адказ на крытыку, якой падвергнуў рашэнне Расіі Аляксандр Лукашэнка.
Прэс-сакратар расійскага лідара таксама адзначыў, што ўсе дзяржавы павінны прымаць актыўныя меры па барацьбе з дадзенай інфекцыяй.
Раней 16 сакавіка прэм'ер-міністр Расіі Міхаіл Мішусцін заявіў, што Масква прыняла рашэнне закрыць мяжу з Беларуссю з-за распаўсюджвання каранавіруса.