Чэхія ўвяла каранцін на ўсёй тэрыторыі
Ад 00.00 16 сакавіка Чэхія закрылася на каранцін. Пра гэта абвясціў прэм’ер-міністар Чэхіі Андрэй Бабіш пасля шасцігадзіннага надзвычайнага паседжання чэшскага ўрада, піша Радыё Свабода.
Стан каранціну прадугледжвае абмежаванне вольнага перамяшчэння грамадзянаў на тэрыторыі Чэшскай Рэспублікі за выключэннем канкрэтна абгавораных выпадкаў і сітуацый.
Абмежаванне вольнага перамяшчэння не пашыраецца на найбольш жыццёва важныя сітуацыі. Можна будзе хадзіць на працу, у аптэку, медыцынскія ўстановы.
Не забаронена таксама бавіць час на прыродзе і ў парках, з умовай датрымання мінімальнай дыстанцыі 2 метры ад іншых людзей.
Абмежаванне вольнага перамяшчэння ўведзенае з прычыны таго, што, як зазначыў Бабіш, некаторыя людзі не выконваюць абмежаванні, уведзеныя супраць далейшага пашырэння каранавіруса.
Міністар унутраных справаў Ян Гамачэк удакладніў: «Мы стараемся мінімілізаваць кантакты паміж людзьмі. Гэта не забарона выходзіць на вуліцу, гэта ня хатні арышт».