Іран выходзіць з ядзернай здзелкі
Іранскія ўлады заявілі пра рашэнне адмовіцца ад выканання аднаго з пунктаў «ядзернай здзелкі», заключанай у 2015 годзе.
Як прагучала ў эфіры дзяржаўнага тэлебачання Ірана, перадае РБК са спасылкай на Ройтэрз, у краіне ўзровень узбагачэння ўрану будзе залежаць не ад умоў пагаднення пяцігадовай даўніны, а ад патрэбаў краіны. Заява была зроблена на фоне эскалацыі напружанасці пасля забойства ў Багдадзе іранскага генерала Касема Сулеймані.
Пры гэтым у Тэгеране асабліва адзначылі, што гатовы працягнуць супрацоўніцтва з МАГАТЭ і вярнуцца да ўмоў пагаднення ў выпадку зняцця амерыканскіх санкцыяў.
Яшчэ ў лістападзе кіраўніцтва Арганізацыі па атамнай энергіі Ірана абвясціла аб запампоўцы газу ў цэнтрыфугі, прызначаныя для ўзбагачэння ўрану да ўзроўню 5%. Такі ўран выкарыстоўваецца ў энергетычных рэактарах па ўсім свеце. Тэхналогія грунтуецца на тым, што газападобныя злучэнні ўрану змяшчаюцца ў цэнтрыфугу, дзе інерцыя прымушае цяжкія малекулы канцэнтравацца ля сценках цэнтрыфугі.
Да заключэння ядзернай здзелкі Іран узбагачаў уран да 20%. Такі уран — з канцэнтрацыяй ізатопа ўран-235 звыш за 20% — называюць высокаўзбагачаным, або зброевым.
Ядзернае пагадненне, вядомае як Сумесны ўсёабдымны план дзеянняў, было падпісана ў 2015 годзе. Яно прадугледжвала абмежаванне ядзернай праграмы Ірана ў абмен на зняцце міжнародных санкцый супраць краіны. У маі 2018 года прэзідэнт ЗША Дональд Трамп заявіў аб выхадзе з Ядзернага пагаднення з Тэгеранам.
