У 53 гады раптоўна памёр бізнэсовец Алег Пашак, які актыўна падтрымліваў беларускую культуру

Увечары 12 снежня памёр бізнесовец, рэстаратар Алег Пашак. Як паведаміў «НН» музычны прадзюсар Зміцер Безкаравайны, прычынай смерці стала сэрца. «Ад яго брата чуў, што прыхапіла сэрца, усё адбылося цягам паўгадзіны», — сказаў Безкаравайны.

Алег Пашак. Фота з facebook.com.

Алег Пашак валодаў рэстаранамі «Камяніца», «Грай», «Агінскі», «Карчма». Дзесяць гадоў запар ён ладзіў фолькавы фестываль «Камяніца», які збіраў шмат гледачоў.

«Вельмі класны чалавек. Ён шмат зрабіў для беларускай культуры, — кажа арганізатар канцэртаў Уладзімір Плавінскі. — Ад пачатку 2000-х, калі адкрылася «Камяніца», там заўсёды грала беларуская музыка, запрашаліся гурты. Алег даваў прастору для некамерцыйных ініцыятываў: «Мова нанова», «Арт-Сядзіба». З ім заўсёды можна было дамовіцца адносна правядзення беларускіх імпрэз».

Уладзімір Плавінскі кажа, што працаваў разам з Пашакам на арганізацыі «Камяніцы». «З боку Алега ўсё было чотка, вельмі арганізавана. Шмат грошай гэта Алегу не прыносіла — проста яму падабалася гэтая справа».

Лідара гурта «Стары Ольса» Змітра Сасноўскага звязвалі з Алегам Пашакам не толькі прафесійнае супрацоўніцтва, але і сяброўства. «Калі ён адкрыў «Камяніцу», то адразу стаў запрашаць нас. Ён былы вайсковец, родам з Гомельшчыны».