У Гомелі, Віцебску і Оршы на Дзяды ўшанавалі памяць рэпрэсаваных
Упершыню ў трох гарадах адначасова — Оршы, Віцебску, Гомелі — на «Дзяды» актывісты і нашчадкі рэпрэсаваных аб'ядналіся, каб зачытаць услых імёны расстраляных у часы сталінскіх рэпрэсій.
Падчас акцыі, прысвечанай памяці ахвяраў палітычных рэпрэсіяў, у Гомелі на Навабеліцкіх могілках прайшла экскурсія, пасля якой настаяцель храма свяшчэннамучаніка Аляксія Лельчыцкага адслужыў паніхіду. Гамельчукі ўпарадкавалі старыя магілы і зачыталі імёны ахвяраў Вялікага тэрору.
У Віцебску каля народнага мэмарыялу ў Хайсах каталіцкі біскуп Алег Буткевіч памаліўся за беларусаў, расстраляных у гады рэпрэсій. Актывісты памянулі забітых у Віцебскай турме НКВД, у прыватнасці Вольгу Данцыт - настаўніцу 30-й школы Віцебска. Асоба 28-гадовай настаўніцы-латышкі была высветленая, дзякуючы грабеньчыку з надрапаным імем, які знайшлі падчас жудасных раскопак у лесе каля вёскі Хайсы. Нядаўна на гэтым месцы быў усталяваны помнік, на якім напісаныя імёны Вольгі Данцыт і 41 латыша, расстраляных у тую ж ноч - 30 красавіка 1938 года. Каардынатар ініцыятывы «Хайсы - віцебскія Курапаты» Ян Дзяржаўцаў назваў імёны расстраляных у Віцебску мастакоў.
У Оршы на Кабыляцкай гары сабраліся мясцовыя актывісты і нашчадкі расстраляных, аб'яднаных у ініцыятыву «Кабылякі. Расстраляныя ў Оршы». Некаторыя з нашчадкаў прыехалі на гэта трагічнае месца ўпершыню, каб ушанаваць памяць родных. Месца масавага пахавання ахвяраў сталінскіх рэпрэсій на Кабыляцкай гары было выяўленае ў 1982 годзе пры будаўніцтве чыгункі.
Удзельнікі акцыі правялі «суботнік» на мемарыяле і зачыталі прозвішчы забітых НКВД. Айцец Аляксандр адслужыў літыю аб усіх забітых і зачытаў імёны 18 расстраляных у Оршы праваслаўных святароў.
Сёння вядомыя прозвішчы каля 2 тысяч чалавек, расстраляных аршанскім НКВД. На думку даследчыкаў, гэтая лічба можа быць значна большай. Але даведацца поўны спіс ахвяр тэрору ў Беларусі пакуль не ўяўляецца магчымым. Архівы КДБ да гэтага часу закрытыя для агульнага доступу.
