Браканьераў, якія падстрэлілі казулю, вылічылі па слядах ад шын БТР ФОТА
gosinspekciya.gov.by
Двух мужчын з Жодзіна затрымалі 27 верасня ў Смалявіцкім раёне, паведамляе БелТА. Браканьеры перасоўваліся на спецыяльна абсталяваным грузавіку ГАЗ-66 з шынамі ад бронетранспарцёра высокай праходнасці. Сляды ад гэтых шын іх і выдалі.
Браканьераў затрымалі, калі яны падстрэлілі казулю з незарэгістраванай двухствольнай стрэльбы. У грузавіку інспектары знайшлі яшчэ некаторыя дэталі браканьерскага цюнінгу. Кузаў машыны быў абсталяваны лябёдкай і адмысловым шчытом для таго, каб у грузавік можна было зацягнуць буйную дзічыну. А на пярэдняй частцы кабіны устаноўлены дадатковыя фары, каб высочваць звера ноччу.
Браканьеры з Жодзіна палявалі на цюнінгаваным аўто ў ваколіцы горада, іх затрымалі з незаконна здабытай казуляй.
Мужчыны палявалі ў забароненым месцы, таму шкоду ад здабычы казулі ацанілі ў трайным памеры - атрымалася 9,2 тысячы рублёў. Заведзена крымінальная справа, яны ўжо пачалі пакрываць шкоду. На аўтамабіль ГАЗ і легкавы аўтамабіль «Нісан», які належыць аднаму з затрыманых, да суда накладзены арышт.