Ці дапамагаюць ачышчальныя палоскі пазбавіцца ад чорных кропак на скуры? Адказвае касметолаг
Пластыр ад чорных кропак — папулярны сродак у дзяўчат. Лічыцца, што такія палоскі добра ачышчаюць поры скуры. Але ці ёсць ад іх карысць на самой справе? Касметолаг Наталля Муха тлумачыць, чаму пластыр ад чорных кропак — проста маркетынгавыя хітрыкі.
Фота Надзеі Рукавічнікавай.
— Ён траўмуе скуру: вы яго наклейваеце і зрываеце з верхнім тонкім слоем скуры. З-за гэтага можа быць потым моцная сухасць. Поры вы не ачышчаеце — проста здымаеце чорнае скураное сала, якое ад паветра акісляецца, і ўсё.
Для глыбокага ачышчэння скуры касметолаг раіць выкарыстоўваць не пластыр, а энзімныя пілінгі. Такія пілінгі больш ашчадныя за звычайныя, бо ў іх актыўнымі рэчывамі выступаюць не кіслоты, а ферменты. Пасля трэба абавязкова зрабіць увільгатняючую маску.
— Залог прыгожай, здаровай скуры — гэта правільнае ачышчэнне і якаснае ўвільгатненне. Гель для ўмывання не павінен быць агрэсіўны, утрымліваць кіслоты. Не варта выкарыстоўваць, як многія любяць, падсушчваючыя ласьёны, калі няма пэўнай праблемы, — дадае доктарка.
