Беларусбанк папярэджвае пра магчымае махлярства ў вайберы
Беларусбанк праінфармаваў сваіх кліентаў аб выпадках махлярства праз вайбер, гаворыцца ў паведамленні банка.
Карыстальнікам прыходзіць у мэсэнджары паведамленне ад падробленага акаўнта «Беларусбанк Анлайн». Акаўнт мае лагатып банка і зарэгістраваны на замежны нумар тэлефона.
Паведамленне можа мець наступны змест: «Паважаны кліент «Беларусбанка», наша служба падтрымкі спяшаецца паведаміць вам, што ў сувязі з частымі выпадкамі махлярства ваша карта заблакіраваная. Баланс 0.01 BYN. Вам варта звярнуцца ў найбліжэйшае аддзяленне банка альбо па нашых кантактах у вайберы». Або паведамленне: «Служба падтрымкі «Беларусбанка» інфармуе, што ў сувязі з частымі ашуканскімі аперацыямі па патрабаванні службы бяспекі ваша карта заблакіраваная. Баланс вашай карты 0.00 рублёў. Для разбору рэкамендуем звярнуцца ў банк альбо звязацца па нашых кантактах у Viber».
Беларусбанк заклікае быць уважлівымі. «Не перадавайце трэцім асобам інфармацыю аб рэквізітах плацежных картак, лагін і пароль для ўваходу ў інтэрнэт-банкінг, 3D-пароль або аднаразовы СМС-пароль, у тым ліку шляхам уводу дадзеных на сумніўных вэб-старонках».
З такім жа зваротам выступіў і Прыёрбанк.
