Слонімскія ўлады абяцалі графіці з Агінскім па-беларуску — і пакуль не выканалі сваіх планаў
Да Дня беларускага пісьменства, якое адбудзецца ў верасні, на сцяне дома па вуліцы Чырвонаармейскай намалявалі графіці — тэатр Міхала Казіміра Агінскага. Надпіс на ім зрабілі па-руску, але абяцалі гэта выправіць.
Чытайце. Графіці ў Слоніме ўсё ж зробяць па-беларуску. Ідэолаг: «Бо чыталі каментары ў сацсетках»
Чытач «Нашай Нівы» Аляксей Дужы 15 траўня звярнуў увагу на тое, што графіці дамалявалі, будаўнічыя лясы прыбралі, а надпіс так і застаўся па-руску.
Фота зробленае 16 ліпеня.
«Я напісаў зварот у Слонімскі райвыканкам, мне паабяцалі, што да 1 чэрвеня надпіс паправяць, але што я бачу па факце? Учора, 16 ліпеня, надпіс застаўся такім жа. Атрымліваецца, улады нас ашукалі?»
Намеснік старшыні Слонімскага райвыканкама Уладзімір Кот супакойвае:
«Да 1 жніўня графіці будзе па-беларуску. Справа ў тым, што на сцяне насупраць тыя ж мастакі, што малявалі тэатр Агінскага, будуць рабіць графіці з выявай Францыска Скарыны. І каб не выклікаць мастакоў па 10 разоў, мы вырашылі, што калі яны пачнуць працу, тады і выправяць гэты надпіс. Да Дня пісьменства ўсё будзе зроблена», — запэўніў чыноўнік «Нашу Ніву».
