Генерал міліцыі Мечыслаў Грыб: Калі б канцэрт спынілі, магло быць яшчэ больш ахвяр
Ці правільна зрабілі арганізатары Дня Незалежнасці, што пасля інцыдэнту падчас салюту, калі траўмы атрымалі многія людзі, не спынілі правядзенне канцэрту? З гэтым пытаннем «Наша Ніва» звярнулася да генерал-лейтэнанта міліцыі ў адстаўцы Мечыслава Грыба.
Мечыслаў Грыб. Фота Радыё «Свабода».
«Па-першае, я хацеў бы адзначыць, што пры правядзенні такіх мерапрыемстваў, як салюты, дзе выкарыстоўваюцца выбуховыя рэчы, трэба вельмі добра арганізаваць бяспеку людзей. І гэта рэальна зрабіць. Салют можна бачыць на вялікай адлегласці, і нельга падпускаць людзей блізка да яго. Патрэбна выключыць усе недарэчнасці і выпадковасці. Усё гэта можна зрабіць, але нехта не зрабіў.
Я прытрымліваюся падыходу, што ў гэтым выпадку канцэрт не трэба было спыняць. У адваротным выпадку было б нашмат болей панікі і неразбярыхі. Маглі б быць і іншыя ахвяры. Маглі б быць натоўпы і на аўтобусы, і на метро. У нас гэта было, мы гэта праходзілі. Калі б толькі абвесцілі, што канцэрт спыняецца, то магла б быць вялікая паніка».
