Караеў: Міліцыя паўстане перад замежнымі гасцямі ветлівай, карэктнай
Міністр унутраных спраў Юрый Караеў наведаў аб'екты, задзейнічаныя на II Еўрапейскіх гульнях, і праверыў гатоўнасць міліцыі да складанага экзамену, паведамляе прэс-служба МУС.
Фота мае ілюстрацыйны характар.
— Гатоўнасць органаў унутраных спраў высокая. Але мы заўсёды павінны прыдзірліва ставіцца да мер, якія прымаем, і лічыць, што яны недастатковыя. Мы самі павінны шукаць магчымыя рызыкі і пагрозы, — адзначыў Юрый Караеў. — Таму гаварыць аб поўнай гатоўнасці было б заўчасна. На практыцы праблемы ўсё роўна з'явяцца і пакажуць нам, што мы не прадугледзелі і як зманеўраваць сіламі і сродкамі, каб гэта палепшыць. Агулам, істотных зменаў аператыўнай абстаноўкі, звязаных з гульнямі, не прагназуецца, для гэтага няма перадумоў.
Міністр таксама адзначыў, што беларуская міліцыя паўстане перад замежнымі гасцямі ветлівай, карэктнай і, па магчымасці, непрыметнай. У гэтай сувязі рэкамендацыя адна — памятаць, што гасцей сустракаюць з усмешкай, як калі б у твой дом прыйшлі сябры.
