Крычаўскія камунальнікі патлумачылі, як у іх атрымалася «празрыстая» кабінка для пераадзявання
У Крычаве на грамадскім пляжы ля мікрараёна Сож з'явілася новая кабінка для пераадзявання. Як аказалася, камунальныя службы не маюць дачынення да арыгінальнага дызайна.
Фота той самай кабінкі з суполкі «Падслухана Крычаў».
Намеснік дырэктара па ідэалагічнай рабоце і добраўпарадкаванні прадпрыемства «Камунальнік» Аляксандр Данін расказаў, што кабінку яны паставілі яшчэ два тыдні таму. Штакеціны былі набіты ў два слоі, без шчылін. Але за выхадныя верхні слой адарвалі.
«Гэта нашы хуліганы пастараліся. Навошта — не зразумела. Не думайце, што мы так спецыяльна зрабілі!» — пракаментаваў Аляксандр Данін.
За заўтра камунальнікі абяцаюць усё адрамантаваць. А вось новых кабінак на гэтым грамадскім пляжы не чакаецца. «У нас тры пляжы, і на ўсіх усталявана па адной кабінцы. Як правіла, яе хапае», — тлумачыць Данін.
