Гамяльчук за 10 гадоў зарабіў $30 тысяч на працэнтах за нелегальныя пазыкі
У Гомелі завяршылі расследаванне крымінальнай справы ў дачыненні да 45-гадовага мясцовага жыхара, распавялі ў Следчым камітэце.
Абвінавачаны з 2007 па 2017 год без атрымання неабходнай ліцэнзіі даваў пазыкі пад працэнты. Большасць яго кліентаў з'яўляліся наведвальнікамі ігральных устаноў і бралі пазыку, каб адыграцца. Сума пазыкі вар'іравалася ад 100 даляраў да 35 тысяч даляраў. Таксама ў заклад мужчына браў залаты гадзіннік, ювелірныя вырабы і аўтамабілі.
Даход, які атрымаў дзялок, ацанілі ў 30 тысяч даляраў.
Акрамя гэтага, устаноўлены і іншыя злачынствы, якія здзейсніў затрыманы. Так, знаходзячыся ў адным з казіно разам са сваім знаёмым, ён адкрыта выкраў у яго фішкі і прайграў іх у рулетку. Пры чарговай сустрэчы пасля патрабаванняў пацярпелага вярнуць грошы за фішкі абвінавачваны яго пабіў. Высветлілася, што абвінавачаны пабіў яшчэ траіх мужчын.
Таксама адзін з пазычальнікаў доўгі час не мог вярнуць свой залаты пярсцёнак, які аддаў абвінавачанаму.
Дзеянні мужчыны кваліфікаваныя следствам адразу па некалькіх артыкулах Крымінальнага кодэкса: замах на незаконную прадпрымальніцкую дзейнасць, звязаную з атрыманнем даходу ў асабліва буйным памеры; парушэнне правілаў аб здзелках з каштоўнымі металамі; рабаванне; злоснае хуліганства; заведама ілжывы данос.
Маёмасць гамельчука (два аўтамабілі, дзве кватэры, скутар) на агульную суму 185 тысяч рублёў арыштавалі.
Крымінальную справу перадалі ў пракуратуру для далейшага накіравання ў суд.
