Беларускі рэпер Бакей: Мне забаранілі тур па краіне з-за аднаго слова ў інтэрв'ю
Беларускаму рэперу Бакею давялося адмяніць тур па Беларусі, бо яму адмовілі ў гастрольным пасведчанні праз «нізкі мастацкі ўзровень творчасці». «Наша Ніва» патэлефанавала Уладзіславу (сапраўднае імя артыста) і спытала, што ён думае на гэты конт.
— Для мяне гэта было дзіўна, бо я не прыніжаю нічые гонар і годнасць, спяваю пра каханне. Пакуль мы ўсё прыпынілі, магчыма, паспрабуем арганізаваць тур яшчэ раз пазней, дзесьці ў канцы месяца. Або ўжо пасля лета.
— А што будзеце рабіць?
— Ды нічога, гэтак жа падавацца. Можа, што зменіцца. Проста мы год таму ездзілі ў тур, усё было выдатна, ніякіх пытанняў.
Бакей расказвае, што гады тры таму ў інтэрв’ю жартам назваў свой стыль «нарка-суіцыдальна-дэнсавы мікс». Вось і зачапіліся.
— У Брэсце аперыравалі гэтым: «Калі вы не прыбярэце ў інтэрнэце тое згадванне, дазволу не будзе». Але нічога нарка-суіцыдальнага ў маіх песнях няма. Я акуратна падыходжу да сваіх тэкстаў, бо ведаю, што мяне слухаюць і тыя, каму няма 18.
Некаторыя радкі з трэкаў, праўда, наўрад ці для непаўналетняй аўдыторыі.
«Нащупай яйца, не начинай
Ныть, что ничего не сделать
В поисках себя попался в клитор
Вечных никчемных затмений», — зачытвае рэпер у трэку Sound.
Уладзіслаў не разумее, як можна ацаніць чыйсьці мастацкі ўзровень: «Гэта не правільна, што нейкая камісія, выбірае, што слухаць людзям, а што не».
— Можа, адмовілі таму, што я рэпер? Нядаўна былі забароны канцэртаў рэпераў, і, напэўна, на гэтым фоне ў міністэрстве вырашылі, што такія заяўкі на тур адразу можна не разглядаць.
— Не бянтэжыць, што Кіркораву і Віктару Каліне дазваляюць гастраляваць, а вам не?
— Ну, Кіркораў і гэтыя рабяты з шоу-бізнесу, напэўна, ужо сталыя народныя артысты і ў іх высокі мастацкі ўзровень.
