Мэй папрасіла ў Туска адтэрміноўку «Брэкзіту» да 30 чэрвеня. Той хоча даць Брытаніі год
Прэм'ер-міністр Вялікабрытаніі Тэрэза Мэй у лісце кіраўніку Еўрапейскай рады Дональду Туску папрасіла адтэрміноўкі выхаду краіны з Еўрасаюза да 30 чэрвеня.
У лісце тлумачыцца, што і ўрад, і парламент Вялікабрытаніі выступаюць супраць выхаду з ЕС без пагаднення, аднак пакуль не прыйшлі да кансенсусу з нагоды умоў «Брэкзіта». Без адтэрміноўкі жа Вялікабрытанія павінна будзе пакінуць ЕС без пагаднення ўжо 12 красавіка.
Мэй таксама заявіла, што паспрабуе дамовіцца з парламентам да 23 мая, каб Вялікабрытанія не ўдзельнічала ў выбарах у Еўрапарламент, аднак у адваротным выпадку гатовая правесці выбары.
Па дадзеных The Guardian, Туск, у сваю чаргу, мае намер прапанаваць лідарам краін ЕС даць ураду Вялікабрытаніі год на ратыфікацыю пагаднення аб «Брэкзіце» ў парламенце — да 10 красавіка 2020 года. Калі здзелка будзе ўхвалена раней, то «Брэкзіт» адбудзецца датэрмінова.
