Польскі генерал: У выпадку нападу Расіі на Польшчу НАТА выкарыстае атамную зброю
Былы галоўнакамандуючы Сухапутных войскаў Польшчы, генерал Вальдэмар Скшыпчак лічыць, што Захад выкарыстае ядзерную зброю супраць Расіі ў выпадку атакі на Польшчу. Пра гэта паведамляе Wirtualna Polska.
«Гэта праўда, што амерыканцы мелі намер нанесці ядзерны ўдар, каб спыніць Чырвоную армію ў Польшчы. Цяпер існуе аналагічны план, калі Пуцін ударыць», — сказаў Скшыпчак.
«Больш за тое, у ваенным сэнсе гэта найбольш разумна. Для нас, палякаў, такі сцэнар, вядома, непрымальны. Але калі выбухне вайна, ніхто не будзе пытацца ў нас думкі. Мы не будзем мяняць геаграфічнае становішча», — адзначыў генерал.
Паводле яго слоў, Польшча з'яўляецца «франтавой дзяржавай, таму яна заўсёды будзе вобласцю сутыкненняў, як гэта прадугледжвалася Варшаўскай дамовай».
«Не трэба быць вялікім стратэгам, каб ведаць, што ў бітве супраць расійскай ваеннай машыны ніводная армія ў Еўропе, у прыватнасці Польшчы, не мела б ніякіх шанцаў», — дадаў у Скшыпчак.
Ён адзначыў важнасць сяброўства ў НАТА і павелічэння абаронных выдаткаў.