Салдат збег з вайсковай часткі ў Печах. Яго шукаюць шосты дзень
19 сакавіка салдат тэрміновай службы Аляксандр Неўмяржыцкі сышоў з часткі ў Печах. Пра гэта паведамляе тэлеграм-канал NEXTA. У Мінабароны інфармацыю пацвердзілі. Кажуць, спагнанняў у дачыненні да салдата не было. Незадоўга да знікнення ён двойчы быў у звальненні — ездзіў на радзіму ў Лельчыцкі раён, піша Tut.by
Прэс-сакратар Мінабароны Уладзімір Макараў паведаміў Tut.by, што праз два дні пасля знікнення камандзір часткі пачаў крымінальную справу па артыкуле 445 (самавольнае пакіданне часці або месца службы).
— Знікненне да двух дзён не лічыцца злачынствам, — растлумачыў прадстаўнік ведамства. — Вайскоўца станоўча характарызуюць. Пошук быў арганізаваны адразу, 19 сакавіка, і працягваецца да гэтага часу. Праінфармаваныя ўсе органы, у тым ліку праваахоўныя. Паведамілі і сям'і, яны таксама не ведаюць, дзе ён.
У Мінабароны адзначаюць, што ім невядома пра факты нестатутных адносін (дзедаўшчыны), якія маглі б стаць прычынай знікнення салдата. Калі віна Неўмяржыцкага будзе даказаная, яму пагражае арышт. За мінулы год самавольна з вайсковай часткі пайшоў толькі адзін салдат.
