Як гастралёры разводзяць на грошы даверлівых пенсіянераў ВІДЭА
Журналісты з Ніжняга Ноўгарада выклалі на Ютуб відэасюжэт, прысвечаны прадаўцам масажных накідак і пыласосаў. Яны прапануюць такія прылады з нацэнкай у 10 разоў, а даверлівых заманьваюць зніжкамі і ільготнымі крэдытамі.
Гісторыя не новая. Але цікава, што на гэты раз як адзін з прадаўцоў адкрыта прызнаў, што з’яўляецца грамадзянінам Беларусі.
Прадавец Максім паведаміў, што з'яўляецца грамадзянінам Беларусі.
Падобныя «бізнэсоўцы» ўвесь час катаюцца па ўсёй тэрыторыі СНД. Прадаюць рознае: посуд, коўдры, пыласосы… Персанажы з відэароліка, напрыклад, прапануюць масажныя накідкі на крэслы. Працэдура стандартная: здымаецца рэстаран ці канферэнц-зала, дзе і праводзіцца «прэзентацыя», на якой гаваркі менеджар распісвае цуды свайго тавару. Мясцовых жыхароў запрашаюць ці абзвоньваючы па тэлефонах, ці дасылаючы прыгожыя каляровыя запрашальнікі.
Прадаўцы ездзяць з такімі гастролямі па ўсіх гарадах, не абыходзячы ўвагай і зусім маленькія. У відэасюжэце, напрыклад, гутарка ідзе ўвогуле пра сяло пад Ніжнім Ноўгарадам, якое называецца Пачынкі.
Адметна таксама, што некаторыя наведнікі «прэзентацыі» загадзя ведалі, што мерапрыемства, мякка кажучы, сумнеўнае. Але ўсё адно выйшлі адтуль з падпісанай дамовай.
Прытым што так званыя «масажныя крэслы», якія прадаюць «гастралёры» — гэта нават не крэслы, а проста накідкі. Каштуюць яны вельмі шмат: «са зніжкай» іх можна набыць на прэзентацыі за 118 тысяч расійскіх рублёў, гэта $1700!
Зразумела, што жыхар расійскай правінцыі такую раскошу дазволіць сабе не можа. Тады яго ўгаворваюць узяць крэдыт. Пры афармленні крэдыту кошт гэтай масажнай накідкі павялічваецца на траціну — да $2,5 тысячы за анучку з вібраматорам. Прытым, што набыць яе самастойна можна ў 12 разоў танней.