Былы старшыня КДБ Сцяпан Сухарэнка звольніўся з Банка Развіцця
Сцяпан Сухарэнка, які з 2005 па 2007 узначальваў КДБ, з 2017 года працаваў у Банку развіцця. Туды ён прыйшоў па запрашэнні Сяргея Румаса і ўзначальваў упраўленне бяспекі і абароны інфармацыі.
Але па інфармацыі «Нашай Нівы» цяпер Сухарэнка там ужо не працуе. Гэты факт пацвердзілі і ў Банку Развіцця. Вядома, што пакінуў пасаду 61-гадовы Сухарэнка яшчэ летам. Але прычыны звальнення і сённяшняе месца яго працы пакуль невядомыя.
Сцяпан Сухарэнка найбольш вядомы сваімі заявамі пра пацукоў. Нібыта ў дзень выбараў у 2006 годзе апаненты Лукашэнкі збіраліся атруціць вадаправод дохлымі пацукамі. Сухарэнка запэўніваў, што апазіцыя планавала выбухі ў школах і сілавы захоп улады з дапамогай баевікоў з Украіны, Грузіі і былой Югаславіі. Праўда, раскрытая «змова» так і не прывяла да судовых працэсаў над «тэрарыстамі».
Пасля звальнення з КДБ Сухарэнка сем гадоў працаваў паслом у Арменіі.
