Бойка ў Горадні: жанчына абцасам прабіла міліцыянту галаву ВІДЭА
Сур'ёзная бойка міліцыянтаў з кліентамі бара ў цэнтры Гродна адбылася ўвечары 5 жніўня, перадае newgrodno.by.
Паводле неафіцыйных дадзеных, бойка адбылася каля аднаго з гродзенскіх бараў. Вялікая кампанія адпачывала на летняй тэрасе бара «Семафор». У нейкі момант разагрэтыя алкаголем гродзенцы сталі абуральна сябе паводзіць, і работнікам бара давялося выклікаць міліцыю.
Праваахоўнікі, якія прыбылі на месца здарэння, паспрабавалі затрымаць хлопцаў за адміністрацыйнае правапарушэнне, аднак атрымалі супраціў. Участковыя выклікалі падмогу з Дэпартамента аховы і разам паспрабавалі суцішыць дэбашыраў. Але ў выніку, у момант затрымання, завязалася бойка, у ход якой умяшаліся і мужчыны з суседняга століка. У выніку пацярпелі абодва бакі — супрацоўнік міліцыі атрымаў удар абцасам у галаву.
Міліцыянту была аказана першая медыцынская дапамога, цяпер ён знаходзіцца ў бальніцы. Жанчына, якая вырашыла такім чынам аднавіць справядлівасць, затрымана. Прычына канфлікту высвятляецца.
