Статкевіча вечарам адпусцілі з ізалятара на Акрэсціна
Апазіцыйнага палітыка Міколу Статкевіча не пакінулі ў ізалятары на Акрэсціна даседжваць адміністратыўны арышт, які ён мусіў адбыць яшчэ ў сакавіку, а выпусцілі на свабоду 4 ліпеня.
Пра гэта паведаміла ў сваім фэйсбуку яго жонка Марына Адамовіч.
Статкевіч быў затрыманы 3 ліпеня каля свайго дома перад анансаванай ім «Акцыяй вызвалення і салідарнасці». Ноч ён правёў у ізалятары, а днём у сераду яго адвезлі у суд Першамайскага раёна. Палітык адмовіўся ўдзельнічаць у судовым паседжанні і запатрабаваў вярнуць яго ў ізалятар.
У выніку суддзя Юры Гарбатоўскі завочна аштрафаваў Статкевіча на 40 базавых велічыняў (980 рублёў) за акцыю 3 ліпеня. Меркавалася, што палітыка павязуць на Акрэсціна даседжваць адміністратыўны арышт за акцыю ў Дзень Волі, аднак увечары ён ужо быў на свабодзе.