Аўстрыя закрывае 7 мячэцяў і высылае некалькіх імамаў, якіх фінансуе Турцыя
Аўстрыя вышле з краіны некалькіх імамаў, якія атрымліваюць фінансаванне з-за мяжы, і закрые сем мячэцяў, якія лічацца месцам распаўсюджвання «палітычнага ісламізму». Пра гэта абвясціў аўстрыйскі канцлер Курц, паведамляе Kurier.
Закрыццё закране ўстановы і мячэці салафітаў, якіх падтрымлівае саюз ATIB. Афіцыйна гэта «Турэцка-ісламскі саюз культурнага і сацыяльнага супрацоўніцтва ў Аўстрыі». Саюз аб'ядноўвае больш за 60 суполак і каля 100 000 чалавек.
Аўстрыйскія ўлады абвінавачваюць ATIB у распаўсюдзе турэцкага нацыяналізму. У прыватнасці, будзе закрыта так званая мячэць «Шэрых ваўкоў» у Вене, а таксама будзе распушчаная ўся рэлігійная арабская абшчына. Курц паведаміў, што гэтыя крокі цесна ўзгоднены з Ісламскай рэлігійнай абшчынай Аўстрыі.
Міністр унутраных спраў Герберт Кікла заявіў, што выгнанне імамаў, звязаных з ATIB, робіцца на падставе закона аб забароне на замежнае фінансаванне.
Пад дзеянне закона ў цэлым могуць патрапіць каля 60 імамаў і члены іх сем'яў, таму Аўстрыя можа не падоўжыць права на жыхарства ў цэлым для 150 чалавек.
