Лукашэнка: Ніхто дэкрэта №3 не адмяняў, а кагосьці трэба проста нахіліць
Кожны чалавек павінен мець магчымасць працаваць і зарабляць.
Пра гэта Аляксандр Лукашэнка заявіў сёння, даючы згоду на назначэнне новых кіраўнікоў мясцовай вертыкалі ўлады.
Кіраўнік дзяржавы падкрэсліў, што ніхто не адмяняў патрабаванне дэкрэта №3, які ў народзе празвалі «дэкрэтам аб дармаедах».
«Гэта будзе ваш дакумент. Вы на месцы павінны вызначыць, хто ў вас не працуе, а павінен працаваць, і прымусіць іх усіх працаваць.
У гэтым будзе асноўная сутнасць дакумента. Не з Мінска трэба кіраваць гэтымі працэсамі», — сказаў Аляксандр Лукашэнка.
«Вы павінны з імі (тымі, каго тычацца нормы дэкрэта) разабрацца. Вось і ўсё вырашэнне пытання. Тады яны не будуць хадзіць і крычаць «гвалт».
Камусьці трэба дапамагчы, кагосьці трэба за руку прывесці на працу, кагосьці перапрафіляваць, навучыць новым спецыяльнасцям, а кагосьці проста нахіліць, — адзначыў беларускі лідар. — Вы ведаеце, што гэта за беспрацоўныя, што гэта за кантынгент, я таксама ведаю, памятаю яшчэ з тых савецкіх часоў. Таму занятасць — пытанне вельмі важнае. Людзям трэба прапаноўваць працу, ствараць працоўныя месцы».
У сувязі з гэтым Лукшэнка нагадаў аб задачы па павелічэнні сярэдняга заробку да 1 тысячы рублёў.
«Калі мы гэтага ўзроўню дасягнем, мы можам спакойна любому чалавеку з 10 мільёнаў сказаць: мы вам дапамаглі, каб вы маглі паесці і сям'ю накарміць, ну а далей ужо напружвайцеся і працуйце самі. Мы, вядома, не будзем у баку, будзем дапамагаць, падтрымліваць. Але гэта важнейшае пытанне», - падкрэсліў Аляксандр Лукашэнка.