Пачаліся беларуска-расійскія вучэнні «Захад-2017»
Яны пройдуць з 14 па 20 верасня.
ТАСС
«У аснову практычных эпізодаў падчас вучэнняў «Захад-2017» пакладзены варыянты сумесных дзеянняў беларускіх і расійскіх частак у сістэме рэгіянальнай групоўкі войскаў, у прыкрыцці ўчасткаў дзяржаўнай мяжы, ахове і абароне ваенных аб'ектаў, блакаванні і ліквідацыі дыверсійна-разведвальных груп і незаконных узброеных фарміраванняў, а таксама падпарадкавання абарончага бою», - адзначыў учора на брыфінгу прадстаўнік Міністэрства абароны Беларусі — памочнік міністра абароны па пытаннях міжнароднага ваеннага супрацоўніцтва Алег Воінаў, піша БелТА.
На вучэннях будуць задзейнічаны палігоны Барысаўскі, Даманаўскі, Ружанскі, Лепельскі, Ласвіда, Асіповіцкі, а таксама два ўчасткі мясцовасці ў Віцебскай вобласці — Дрэтунь і Глыбокае.
Пры вызначэнні раёнаў практычных дзеянняў войскаў былі прынцыпова выбраны палігоны, якія знаходзяцца на значнай адлегласці ад мяжы з Украінай, Польшчай, Літвой і Латвіяй, асабліва падкрэсліў памочнік міністра абароны.
Таксама вучэнні будуць праводзіцца на трох палігонах у Расіі.
Мінабароны абяцае поўную галоснасць вучэнняў і штовечар ладзіць брыфінг.
Раней паведамлялася, што Лукашэнка і Пуцін наведаюць вучэнні, але зробяць гэта на палігоне ў Расіі.
***
«Захад-2017» пройдзе 14-20 верасня на тэрыторыі Беларусі і трох палігонах Расіі з удзелам 12,7 тыс. вайскоўцаў. Пры гэтым у Беларусі будзе задзейнічана каля 10,2 тыс. чалавек, 370 адзінак бранятанкавай тэхнікі, у тым ліку каля 140 танкаў. Таксама будзе выкарыстана да 150 адзінак артылерыі і рэактыўных сістэм залпавага агню, больш за 40 самалётаў і верталётаў.