У Шуміліне невядомы папрасіў у маладой касіркі перавесці яму $30 тысяч «для праверкі сістэмы». І атрымаў іх
У працоўны час 6 красавіка на тэлефон касіркі аднаго з банкаў у Шуміліна Віцебскай вобласці патэлефанаваў мужчына, які прадставіўся супрацоўнікам тэхнічнай падтрымкі праграмнага забеспячэння банка. Касірцы ён патлумачыў, што для праверкі сістэмы патрабуецца здзейсніць некаторыя аперацыі і даў указанні, як пералічыць грошы, паведамляе Следчы камітэт.
У выніку аперацый 26-гадовай касіркай банка ажыццёўлены міжнародныя грашовыя пераводы на суму больш за 1,9 мільёна расійскіх рублёў і $4900. Частка аперацый (больш за 260 тысяч расійскіх рублёў) была заблакавана сістэмай банка.
Агулам злачынец атрымаў каля $30 тысяч у эквіваленце.
Шумілінскага раёна аддзелам Следчага камітэта па гэтым факце распачата крымінальная справа па артыкуле «замах на махлярства, здзейсненае ў асабліва буйным памеры».