«Залаты глобус»: «12 гадоў рабства» — найлепшы фільм-драма
У Лос-Анджэласе прайшла цырымонія ўручэння ўзнагародаў «Залаты глобус».
Карціна «12 гадоў рабства» брытанскага рэжысёра Стыва МакКуіна стала найлепшым фільмам-драмай.
У фільме распавядаецца гісторыя чарнаскурага амерыканца: ён нарадзіўся свабодным, але быў незаконна прададзены ў рабства ў паўднёвых штатах у ЗША ў 1830-х. Гэта экранізацыя аднайменнай аўтабіяграфіі рэальнага чалавека — Саламона Нортапа.
У намінацыі «Найлепшая камедыя ці мюзікл» перамагла «Афёра па-амерыканску».
Прыз за найлепшую рэжысуру атрымаў мексіканец Альфонса Куарон за карціну «Гравітацыя».
Найлепшай драматычнай актрысай стала Кейт Бланшэт за ролю ў фільме «Жасмін» Вудзі Алена. Пераможцам у намінацыі «Найлепшая мужчынская роля ў драматычным фільме» стаў Мэцью Маконахі, які сыграў хворага СНІДам у карціне «Даласкі клуб пакупнікоў».
Актрыса Эмі Адамс, якая сыграла ў фільме «Афёра па-амерыканску», перамагла ў намінацыі «Найлепшая жаночая роля ў камедыі або мюзікле».
Леанарда Ды Капрыа, які сыграў у «Ваўку з Уол-стрыт» Скарсэзэ, перамог у намінацыі «Найлепшая мужчынская роля ў камедыі або мюзікле».