Skandał na «Dziadach» u Łošycy: KCHP-BNF abviaściła historyka Ihara Kuźniacova piersonaj non-hrata ŭ Kurapatach
Na žałobnuju akcyju ŭ Łošycu pryjšło kala 100 čałaviek
14:08
Mitynh zakončyŭsia vystupam Alesia Čacholskaha. Jon raspavioŭ pra historyju Łošycy i stalinskich represijaŭ. Zaklikaŭ da salidarnaści i jednaści. Na zaviaršeńnie praśpiavali himn "Mahutny Boža", uskłali kvietki i zapalili śviečki.
14:04
Udzielniki akcyi ŭskładajuć kvietki dy zapalvajuć źničy ŭ Łošyckim jary.
13.30
Vystupiŭ Valery Bujvał, jaki začytaŭ list Zianona Paźniaka, u jakim koratka było raspaviedziena pra historyju Łošyckaha jaru, što tut pachavana nia mienš za 10 tysiačaŭ biełarusaŭ, i što hvałtam byli spynienyja sproby pravieści raskopki. Pavodle słovaŭ lidara KCHP-BNF, heta śviedčyć, što tut sapraŭdy masavyja pachavańni ludziej. U liście Zianon Paźniak pravioŭ paralel ź siońniašnim časam. Pavodle jaho, FSB i KHB - pierajemniki tradycyjaŭ NKVD.
Zatym Valery Bujvał praciahnuŭ dumku Zianona Paźniaka i raspavioŭ pra Kurapaty, pra toje, što tudy časta ŭmiešvajucca ludzi, jakija nie źjaŭlajucca sapraŭdnymi historykami i navukoŭcami, i nazvaŭ Ihara Kuźniacova, jaki jak palitruk savieckaha vojska, zrabiŭ bliskučuju karjeru ŭ Rasiei, a paśla pryjechaŭ u Biełaruś. Maŭlaŭ, nie zarbiŭšy ničoha ŭ Kurapatach, jon biare na siabie rolu asoby, jakaja kłapocicca pra hetaje miesca. Partyja KCHP-BNF abviaščaje Kuźniacova personaj non-hrata ŭ Kurapatach. Padziakavaŭ Radyjo Svaboda, što raspaviała bijahrafiju Ihara Kuźniacova.
Paśla pramaŭlaŭ Juraś Bieleńki, jaki taksama pravioŭ paraleli, što tyja "stalinskija katy" ciapier dziejničajuć inšymi srodkami, vyniščajučy biełaruskuju movu i biełaruskuju kulturu, ale biełarusy pavinny salidaryzavacca. i fakt takoj salidarnaści - ihnaravańnie vybaraŭ u deputaty parlamentu.
13.00
U akcyi prymaje ŭdzieł niekalki dziasiatkaŭ čałaviek. Pad bieł-čyrvona-biełymi ściahami jany rušyli na miesca mitynhu.
* * *
Siońnia ŭ Łošyckim Jary, na miescy masavych rasstrełaŭ, adbudziecca tradycyjny žałobny mitynh.
Zbor udzielnikaŭ — z 12:00 da 12:30 na placoŭcy la pałaca kultury «Łošycki».
Mitynh u Łošyckim jary — z 13:30 da 15:00.
* * *
Łošycki jar — uročyšča, dzie orhany NKUS u 1937–1941 hadach pravodzili masavyja rasstreły. Kolkaść achviaraŭ zastajecca nieviadomaj.U 1988 hodzie jar zasypali, a na jaho miescy zbudavali haražny kaaperatyŭ.
