Prafsajuz 2-j minskaj balnicy admaŭlaje namier daktaroŭ pravieści zabastoŭku

Vykanaŭca abaviazkaŭ staršyni prafkama 2-j haradskoj kliničnaj balnicy Minska Jaŭhien Chramkoŭ abvierh infarmacyju ab tym, što kalektyŭ daktaroŭ hetaj ustanovy achovy zdaroŭja maje namier abviaścić zabastoŭku, kali pavodle vynikaŭ vieraśnia nie buduć vykanany ich patrabavańni ab pavyšeńni zarpłaty.

Pra toje, što prykładna 30 daktaroŭ 2-j balnicy abiacajuć zvolnicca paśla 30 vieraśnia, kali im nie pavialičać zarpłatu,

paviedamiŭ 7 vieraśnia internet-resurs «Biełaruski partyzan». Elektronny list z takoj infarmacyjaj pierad tym prychodziŭ i na adras "Našaj Nivy", ale publikacyi nie było, bo nam nie ŭdałosia zdabyć paćviardžeńnia takich źviestak.

«Ułady abiacali padniać akłady miedykam, ale lekary, jakich u krainie naličvajecca bolš jak 100 tys., patrabujuć adekvatnaha pavyšeńnia zarpłaty nie mienš jak na 700 jeŭra, — havaryłasia ŭ tym liście (da ŭzroŭniu zarobku miedykaŭ va ŭschodnich krainach Jeŭrasajuza). — Ź miedrabotnikami nichto nie ličycca na fonie rostu cen na pradukty i za kamunalnyja pasłuhi ŭ krainie. Prafsajuzy miedrabotnikaŭ źjaŭlajucca pradažnymi vykanaŭcami ŭ rukach ułady. Akład — heta acenka dziaržavaj pracy rabotnika, uzroŭniu jaho kvalifikacyi, jaho viedaŭ i namahańniaŭ».

Salidarnaść z patrabavańniami miedykaŭ vykazaŭ niezaležny prafsajuz RUVP «Hranit», adkryty list jakoha było razasłany ŭ ŚMI. «Čynoŭniki Ministerstva achovy zdaroŭja, stvaryŭšy sabie raskošnaje žyćcio, zusim zabylisia ab tych, chto pracuje ŭ vielmi ciažkich umovach, niedasypajučy i pierapracoŭvajučy, ratujučy zdaroŭje i žyćci našych hramadzian», — havorycca ŭ liście. «Niekatoryja skažuć, što lekary patrabujuć zanadta vysokuju zarabotnuju płatu. Ale paraŭnajcie patrabavańni ŭračoŭ z dachodami čynoŭnikaŭ, uklučajučy roznyja nadbaŭki i štomiesiačnyja premijalnyja, jakija niaredka dasiahajuć 100%», — zajaŭlajuć pradstaŭniki prafsajuza.

Niezaležny prafsajuz RUVP «Hranit» taksama źviarnuŭsia da pracoŭnych kalektyvaŭ Biełarusi z prapanovaj padtrymać patrabavańni daktaroŭ 2-j balnicy Minska.

Na pytańnie, ci maje namier štości prymać u takoj situacyi prafsajuz 2-j balnicy, vykanaŭca abaviazkaŭ staršyni prafkama zajaviŭ, što «list uračoŭ — prosta chulihanstva, i ničoha padobnaha nie było».

Pavodle jaho słoŭ, prafkam daviedaŭsia pra list sa ŚMI. Byŭ praviedzieny schod kalektyvu, na jakim vyśvietliłasia, što nichto pra zapłanavanuju zabastoŭku nie čuŭ. Jon taksama adznačyŭ: zarpłaty va ŭstanovie vyšej, čym ukazanyja ŭ liście, a ŭsie pytańni apłaty pracy vyrašajucca miedykami ŭ apieratyŭnym paradku z administracyjaj.

Raniej u pryjomnaj balnicy admovilisia kamientavać infarmacyju pra mahčymuju zabastoŭku daktaroŭ.

Pavodle infarmacyi viadučaha ekanamista płanava-ekanamičnaha adździeła balnicy Aleny Ažhirej, siaredniaja naličanaja zarpłata ŭračoŭ za žnivień skłała prykładna 5 młn. 500 tys. rubloŭ, siaredniaha miedpiersanału — 3 młn. 742 tys., małodšaha miedpiersanału — 2 młn. 350 tys. rubloŭ.

Vraču-terapieŭtu ŭ siarednim u žniŭni było naličana prykładna 3,5 młn. rubloŭ, chirurhu — prykładna 6 młn., uraču-chirurhu, jaki vykonvaje vysokatechnałahičnyja apieracyi, — 8–9 młn. rubloŭ.

BiełaPAN; MB

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH