I chto ž jany, tyja Vałovičy?

Daśledčyki viadomaha biełaruska-polskaha rodu Vałovičaŭ źbiarucca 15–16 kastryčnika ŭ Hrodnie,

paviedamili ŭ centry masavych kamunikacyj Hrodzienskaha dziaržuniviersiteta imia Ja.Kupały.

Na bazie VNU adbudziecca respublikanskaja navukovaja kanfierencyja «Rod Vałovičaŭ u historyi i kultury VKŁ (XV–XVII stst.)», jakaja pravodzicca ŭ ramkach Dziaržaŭnaj prahramy navukovych daśledavańniaŭ na 2011–1015 hady «Humanitarnyja navuki jak faktar raźvićcia biełaruskaha hramadstva i dziaržaŭnaj ideałohii».

U rabocie kanfierencyi prymuć udzieł vučonyja Instytuta historyi NAN Biełarusi, Biełaruskaha navukova-daśledčaha centra elektronnaj dakumientacyi, Nacyjanalnaha navukova-daśledčaha archiva Biełarusi, Akademii ŭnutranych spraŭ RB, Połackaha dziaržuniviersiteta, hrodzienskich VNU.

Daśledčyki pradstaviać novyja fakty radasłoŭnaj Vałovičaŭ, ab žyćci, dziejnaści i ŭładańniach pradstaŭnikoŭ hetaha dvaranskaha rodu ŭ Hrodzienskim paviecie, Mahiloŭskim starostvie. Buduć uzdymacca pytańni ich roli ŭ palityčnym žyćci Vialikaha kniastva Litoŭskaha. Udzielniki kanfierencyi pradstaviać znojdzienyja dakumienty pa historyi rodu Vałovičaŭ, źviestki ab rodzie ŭ biełaruska-litoŭskich letapisach i chronikach, ikanahrafiju Vałovičaŭ. U tym liku budzie razhledžana pytańnie pradstaŭleńnia rodu ŭ turystyčnaj pierśpiektyvie Hrodzienskaj vobłaści.

Biełaruska-polski rod Vałovičaŭ adyhraŭ značnuju rolu ŭ historyi sučasnaj Biełarusi i Polščy. Mnohija ź jaho pradstaŭnikoŭ u rozny čas zajmali vysokija dziaržaŭnyja, vajennyja i carkoŭnyja pasady ŭ VKŁ i Rečy Paspalitaj. Vałovičy pakinuli naščadkam i architekturnuju spadčynu. U pryvatnaści, u śpis materyjalnych historyka-kulturnych kaštoŭnaściej Biełarusi ŭniesieny pabudavany ŭ kancy XVIII stahodździa pa prajektu italjanskaha architektara Džuzepe de Saka ŭ Hrodzienskim rajonie pałacava-parkavy kompleks «Śviack», jaki naležaŭ hetaj siamji. Ciapier abjekt pieradadzieny kamiercyjnaj struktury Nacyjanalnaha banka AAT «Sanatoryj «Aziorny» dla adnaŭleńnia i dalejšaj ekspłuatacyi z vykanańniem achoŭnych abaviazacielstvaŭ.

Alena Stasiukievič, BiełTA

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH