U Biełarusi zadumalisia ab dziaržaŭnaj atestacyi błohieraŭ i influjensieraŭ
Čynoŭniki ličać, što nie ŭsich možna dapuskać da takoj dziejnaść.
Ina Babačenka. Skrynšot videa STB.
Čynoŭniki zadumalisia ab uviadzieńni dziaržaŭnaj atestacyi abo licenzavańnia dla błohieraŭ, influjensieraŭ i koŭčaŭ, jakija pradajuć svaje kursy ŭ internecie.
Z takoj idejaj u efiry STB vystupiła namieśnik dyrektara Departamienta pa pradprymalnictvie Ministerstva ekanomiki Biełarusi Ina Babačonak.
Pavodle jaje słoŭ, «uzrovień samaabarony» ad niajakasnych pasłuh u internecie nie va ŭsich hramadzian vysoki. Tamu jaho pavinna zabiaśpiečvać dziaržava — prynamsi ŭ śfierach adukacyi, achovy zdaroŭja, psichałohii i hetak dalej.
«Kali my kažam, što pavinny być peŭnyja atestacyi, akredytacyi, licenzavańnia, inšyja achoŭnyja instrumienty.
I tut navat sprava nie ŭ tym, u jakoj formie budzie ažyćciaŭlacca hety vid dziejnaści — IP, jurydyčnaja asoba abo samastojnaja prafiesijnaja dziejnaść, — a ŭ tym, jak buduć dapuskacca da ažyćciaŭleńnia hetaha vidu dziejnaści. Heta značyć da pradastaŭleńnia adpaviednaj pasłuhi abo vykanańnia takoj pracy», — parazvažała Babačonak.
Jašče adzin momant, jaki abmiarkoŭvajuć čynoŭniki, heta padatkaabkładańnie błohieraŭ. Pieršy namieśnik ministra finansaŭ Dźmitryj Kijko ličyć, što treba raspracavać zrazumiełuju sistemu apłaty padatkaŭ dla pracujučych u Internecie.
«Dla takoj katehoryi, jakaja pracuje praź internet, treba prapanavać vielmi prosty sposab vypłaty padatkaŭ, inakš prakantralavać niemahčyma. Z ulikam taho, što heta dystancyjna, ich vialikaja kolkaść, padatkovaha inśpiektara da kožnaha nie prystaviš. Jak zrabić kantrolnuju zakupku, taksama niezrazumieła. Tamu tam ličbavyja płatformy, jakija miarkujuć častku svajho dachodu zapłacić, pavinna być prazrystaść», — adznačyŭ Kijko.
Na jaho dumku, novyja ŭmovy nieabchodna ŭličvać u zakonie, u tym liku atrymańnie błohierami danataŭ.
