Na Padlaššy znajšli vialiki archiŭ zdymkaŭ miascovych biełarusaŭ stahadovaj daŭniny
U pryvatnych damach padlašskich miastečak Hajnaŭka i Klaščeli, u jakich žyvie šmat miascovych aŭtachtonnych biełarusaŭ, znajšli šmatlikija archiŭnyja fotazdymki žycharoŭ Padlašša — palakaŭ, biełarusaŭ i jaŭrejaŭ. Bolš za 13 tysiač zdymkaŭ polska-biełaruskaha pamiežža źmieščana na Albom.pl, piša Mostmedia.io.
Zdymak: Czesław Kamiński / Albom.pl
Pa infarmacyi vydańnia Kurier Poranny, daśledčyki vyśvietlili, što vialikuju kolkaść zdymkaŭ zrabiŭ Česłaŭ Kamiński, siamja jakoha pachodziła ź Minska. Baćka Česłava pracavaŭ u Biełarusi na paravoj fabrycy, a paźniej byŭ kasiram Cyvilnaj upravy ŭschodnich ziemlaŭ. U toj ža čas sam Česłaŭ navučaŭsia ŭ Minskaj himnazii, ale nie bieź pieraškodaŭ — vučoba davałasia jamu składana. Chłopiec zavaliŭ ekzamieny pa polskaj i niamieckaj movach, nie adoleŭ i hieahrafii. Baćku daviałosia pisać list dyrektaru himnazii z prośbaj nie adličvać Česłava.
Kali ŭ 1924 hodzie siamja pierajechała ŭ Hajnaŭku, Česłaŭ znoŭ nie vytrymaŭ ekzamienaŭ užo ŭ polskaj škole (na toj momant junaku było ŭžo 20 hadoŭ) — pryjšłosia iści ŭ armiju. Praz 8 hadoŭ małady čałaviek trahična zahinuŭ. Ale paśla siabie pakinuŭ šmat kaštoŭnych dla biełaruska-polskaha pamiežža dakumientaŭ: niehatyvy z Hajnaŭki, siamiejnyja fotazdymki, a taksama zdymki čyhunki ŭ Biełaviežy. Zachavalisia taksama pracoŭnyja dziońniki, listy i rukapisnyja natatki.
Archiŭ nie byŭ stračany dziakujučy siamji Pietračukovych — Piatro i Hanna nabyli draŭlany davajenny dom na vulicy Varšaŭskaj u Hajnaŭcy. Padčas ramontu jany znajšli staryja niehatyvy i dakumienty Česłava.
Čytajcie taksama:
Rasfarbavali zdymki Pinska, zroblenyja ŭ 1934 hodzie amierykanskaj daśledčycaj
Anatol Klaščuk: Pakul źbiraŭsia, pakul pryjechaŭ — u vioscy ŭsie pamierli
