Daktary — pra siaredni zarobak u 1000 rubloŭ: «Pracuju biez abiedu i adpačynku, ale nie baču takoj sumy»
Urad abiacaje padniać zarobki biudžetnikam da kanca hoda da 800 rubloŭ. Pry hetym daktary, prafiesary i vykładčyki, pavodle aficyjnaj statystyki, u červieni ŭ siarednim atrymlivali bolš za 1000 rubloŭ. Paśla vychadu tekstu ź infarmacyjaj ab siarednich zarobkach daktaroŭ u Tut.by stali źviartacca miedyki, jakija cikavilisia, «kamu sa śpiecyjalistaŭ płaciać takija sumy, bo my nie bačym takich hrošaj».
- Ja pracuju doktaram u paliklinicy ŭ Minsku. U nas na 9 učastkaŭ 4—5 daktaroŭ, pryčym na 2-ch učastkach niama i miedsiaścior, - napisała ŭ redakcyju čytačka. - U mianie pytańnie da ahučanych aficyjnych zarobkach miedykaŭ i nastaŭnikaŭ. Šmat chto ź miedykaŭ letam pracujuć za 2-3 supracoŭnikaŭ kožny, a nastaŭniki letam, mabyć, zastajucca na adnu staŭku (što i adbiłasia ŭ raźlikoŭcy).
Jašče adzin miedyk — Maryna (imia źmieniena pa prośbie čytački) - pracuje doktaram vyjaznoj bryhady chutkaj dapamohi ŭ adnym z abłasnym centraŭ. Staž pracy — hod.
- Zarpłata ŭ daktaroŭ bolš za 1000 rubloŭ - heta zanadta šmat, asabliva kali na adnu staŭku. Ja nie viedaju, chto ź śpiecyjalistaŭ moža jaje atrymlivać, — adznačaje Maryna. — Niekatoryja mohuć pracavać na 1,5 staŭki, da prykładu, fielčary, bo ŭ ich zarobak jašče nižej. Kali na staŭku pracavać, to kala 350 rubloŭ atrymlivajecca. Tamu śpiecyjalisty vymušanyja brać dadatkovuju pracu. Mnie ciapier možna ŭziać dadatkovyja hadziny, ale heta ciažka, tamu ja hetaha nie rablu. U nas pastajannyja raźjezdy, nočču redka možna paspać.
U ahučanyja prahnozy ŭrada, što da kanca hoda atrymajecca vyjści na siaredniuju zarpłatu ŭ biudžetnikaŭ u 800 rubloŭ, Marynie słaba vierycca.
- Zaraz atrymlivaju kala 650 rubloŭ, try miesiacy tamu - kala 600 rubloŭ. Heta z premijami i dapłatami, u tym liku i za škodnaść, - kaža Maryna. - Kalehi, u jakich vyšej katehoryja, atrymlivajuć bolš. Niekatoryja ź ich zarablajuć i 800 rubloŭ. Ale heta nie šmat chto. Ja pracuju 24 hadziny, zatym troje sutak vychadnych. Praca niaprostaja, nie dla dziaŭčyny. Pracuju biez snu i adpačynku, ale nie atrymlivaju 1000 rubloŭ.
Maryna płanuje pieravučycca, kab «źmianić rod dziejnaści, choć zarpłata, chutčej za ŭsio, źmienšycca, pryjdziecca brać dadatkovuju staŭku».
Pry hetym kiraŭnictva, pa jaje słovach, moža pazbavić premii za pramaški ŭ pracy.
- Za niedachopy mohuć źniać premiju - ad 20% da poŭnaha pazbaŭleńnia. Mohuć pazbavić, naprykład, za niapravilna zapoŭnienuju dakumientacyju, - reziumuje Maryna.
Siońnia ŭ ahulnarespublikanskim banku vakansij značycca bolš 2300 prapanoŭ dla daktaroŭ. Pry hetym zarobak bolš za 1000 rubloŭ prapanujuć tolki 28-mi śpiecyjalistam.
Da prykładu, «Minskrambud» šukaŭ terapieŭta 1-j ci vyšejšaj katehoryi ŭ azdaraŭlenčy kompleks «Spadarožnik», śpiecyjalistu abiacali płacić ad 1000 rubloŭ. Futbolny kłub «Šachcior» taksama mieŭ patrebu ŭ doktary, śpiecyjalistu hatovyja byli płacić ad 1200 rubloŭ. U 5-ja haradskuju kliničnuju balnicu ŭ Minsku patrebien byŭ aniestezijołah-reanimatołah na 1265 rubloŭ u miesiac.
Tym časam vice-premjer Vasil Žarko, vystupajučy 20 žniŭnia na telekanale «Biełaruś 1», spyniŭsia na pytańni zarpłaty biudžetnikaŭ, adznačyŭšy, što jana pavinna być hodnaj, i ŭrad prykładaje ŭsie siły, kab jaje padniać z červieńskich 650 rubloŭ u nastaŭnika da žadanych 800—1000 rubloŭ.
