U Viciebsku šukajuć žančynu, jakaja ŭziała zabyty ŭ abmieńniku smartfon
Žančyna padabrała smartfon, zabyty kala kasy abmieńnika ŭ kramie «Jeŭraopt» u viciebskim handlovym centry «Marka-sici», ciapier jaje šukaje milicyja.
Na videa z kamiery nazirańnia, pradastaŭlenym pravaachoŭnymi orhanami, vidać, što smartfon zabyła ciemnaskuraja dziaŭčyna, jakaja mianiała valutu pierad joj. Praź niekatory čas, kali ŭładalnica hadžeta syšła, žančyna zabrała jaho i, skončyŭšy abmien svaich hrošaj, syšła.
Milicyja paviedamlaje prykmiety padazravanaj: na vyhlad kala 35-40 hadoŭ, rost 165-170 santymietraŭ, ź ciomnymi da plačej vałasami, siaredniaha ciełaskładu. Jana była ŭ ciomna-sinim švedry, čornych štanach i śvietłym abutku.
Zhodna ź biełaruskim zakanadaŭstvam prysvajeńnie znojdzienaj čužoj rečy ciahnie administracyjnuju adkaznaść pa artykule 10.6 KaAP, jakaja praduhledžvaje papiaredžańnie abo štraf da 115 rubloŭ. U vypadku naŭmysnaha prysvajeńnia zaviedama čužoj majomaści ŭ asabliva bujnym pamiery znojdzienaha čakaje kryminalnaja adkaznaść pa artykule 205 KK (kradziež).
Kali vy znajšli čužuju reč, to treba nieadkładna paviedamić jaje haspadaru i viarnuć znojdzienuju majomaść. Kali reč znojdzienaja ŭ pamiaškańni abo ŭ transparcie, jaje treba addać ŭładalniku pamiaškańnia abo transpartu, abo jaho pradstaŭniku. Tady ŭžo jon pavinien kłapacicca pra toje, jak znajści haspadara. U vypadku, kali haspadara vy nie viedajecie i nie možacie jaho znajści, znachodku nieabchodna adnieści ŭ milicyju. Kali za paŭhoda jaje haspadar nie znojdziecca, reč stanie vašaj.
