Polšča dumaje zbudavać AES pablizu Kalininhrada
Budaŭnictva pieršaj polskaj atamnaj elektrastancyi ŭ Žarnoŭcy pad Hdańskam było pačataje ŭ 1983 hodzie, ale spyniłasia ŭ 1989 hodzie paśla avaryi na Čarnobylskaj AES i chvali pratestaŭ. Aficyjna budaŭnictva spynili taksama praz sumnievy ŭ rentabelnaści paraŭnalna z tradycyjnymi elektrastancyjami, a taksama pytańni z enerhietyčnym balansam.
Ale z taho času polskija palityki peryjadyčna prapanujuć abo dabudavać AES u Žarnoŭcy, abo zbudavać stancyju na novym miescy.
Ministar enerhietyki Polščy Kšyštaf Tchužeŭski, jaki nazyvaje siabie prychilnikam budaŭnictva AES, zajaŭlaŭ u traŭni, što rašeńnie ab AES moža być pryniataje ŭžo da kanca 2017 hodu, ale dakładna nie paźniej za 2020 hod. U bližejšyja 30—40 hod Tchužeŭski chacieŭ by bačyć u Polščy da troch atamnych stancyjaŭ.
Užo ŭ žniŭni Ministerstva enerhietyki Polščy zajaviła, što rychtuje 10-hadovuju prahramu budaŭnictva AES mahutnaściu 1000 MVt (dla paraŭnańnia, prajektavanaja mahutnaść BiełAES — da 2400 MVt), ale nie admaŭlajecca i ad planaŭ budaŭnictva vuhalnych ciepłaelektrastancyjaŭ.
Vydańnie Dziennik Gazeta Prawna 3 žniŭnia paviedamiła sa spasyłkaj na ŭłasnyja krynicy, što rašeńnie budavać AES pryniataje. Ale jašče nia vyrašana, na jakija hrošy jana budzie budavacca i pavodle čyich technalohijaŭ: pavodle hazety, Ministerstva finansaŭ za francuskija technalohii, Ministerstva enerhietyki za karejskija i kitajskija. Technalohija maje być vyznačanaja tenderam, azijackaja moža spravakavać prablemy z sertyfikacyjaj na eŭrapiejskim rynku enerhii.
Budaŭnictva AES papiarednie aceńvajecca ŭ 16 młrd złotych — kala 4,45 młrd dalaraŭ (na BiełAES užo patracili 2,5 młrd, na jaje jość kredyt ad Rasiei na sumu da 10 młrd dalaraŭ). Tchužeŭski vyklučyŭ finansavańnie budaŭnictva ź dziaržaŭnaha biudžetu ci praz kantrakty na harantavanuju canu elektryčnaści. Ale ŭ 2011 hodzie paviedamlałasia, što prajekt AES aceńvaŭsia ŭ 30 młrd dalaraŭ.
Tymčasam Polšča admoviłasia kuplać elektryčnaść ź BiełAES, kali taja budzie dabudavanaja: jana dałučyłasia da litoŭskaha bajkotu praz sumnievy ŭ biaśpiecy stancyi, jakuju buduje rasiejski «Rosatom».
Dzie chočuć budavać
Ekalahičnyja daśledavańni pravodziacca na dźviuch placoŭkach: Lubiatova-Kapalina ŭ hminie Chačeva i Žarnoviec u hminie Puck, dzie ŭžo pačynali budavać AES. Abiedźvie placoŭki — na poŭnačy Polščy, na kašubskich ziemlach kala Hdańsku.
Ščylnaść nasielnictva mienavita ŭ rajonie placovak siaredniaja, ale za 70- 100 km ad jaje znachodzicca ahlameracyja, viadomaja ŭ Polščy jak «Trójmiasto» — łučnaść Hdańsku, Hdyni i Sopata, adzin z samych hustanasielenych rajonaŭ Polščy, dzie žyvie kala 750 tysiač čałaviek.
Placoŭki znachodziacca pryblizna za 300 km ad Kalininhradu (na inšym ad jaho bierazie Hdańskaj zatoki), za amal 800 km ad biełaruskaj Horadni.
Miesca budaŭnictva Žarnovieckaj AES:
