Bijołahi pieratvaryli kurkumu ŭ nanačaścicy, jakija zabivajuć rak
Naukoŭcy dakazali, što kurkuma moža być karysnaja nie tolki ŭ jakaści śpiecyi. U artykule, apublikavanym u časopisie Nanoscale, navukoŭcy zajaŭlajuć, što zvyčajnuju kurkumu možna vykarystoŭvać dla stvareńnia nanačaścic, jakija vyklikajuć masavuju hibiel rakavych kletak mozhu i inšych častak cieła.
Roznyja formy raka hałaŭnoha i śpinnoha mozhu — adnosna redkija ŭ paraŭnańni z rakam hrudziej, prastaty ci kišečnika, adnak heta kampiensujecca ich ahresiŭnaściu i niebiaśpiekaj dla čałavieka. Taki rak u bolšaści vypadkaŭ viadzie da chutkaj hibieli pacyjenta z-za składanaściaŭ va ŭžyvańni chimijaterapii abo niemahčymaści chirurhičnaha ŭmiašańnia.
Rak mozhu čaściej za ŭsio pahražaje dzieciam, a nie darosłym. Da hetaha času nie było srodkaŭ, jakija mahli b praduchilić raźvićcio hetych puchlin i pry hetym nie vyklikać masavuju hibiel zdarovych kletak mozhu. Adnosna niadaŭna navukoŭcy vyjavili, što viatroŭnik i niekatoryja inšyja raśliny ŭtrymlivajuć u sabie rečyvy, jakija zdolnyja lekavać hety rak.
Anałahičnyja malekuły ŭtrymlivajucca ŭ kurkumie - zvyčajnaj śpiecyi, što vyrablajecca ź pieramołatych kareniščaŭ raśliny Curcuma longa. Prablema składałasia ŭ tym, što ich niemahčyma rastvaryć u vadzie. Heta pieraškadžała ich vykarystańniu dla baraćby z rakam, bo ich niemahčyma dastavić da puchliny i raŭnamierna raźmierkavać pa joj.
Aŭtary artykuła znajšli sposab vyrašyć hetuju prablemu, dałučyŭšy malekuły kurkumina da pavierchni nanačaścic z aksidu ceryja, zdolnych pranikać unutr rakavych kletak. Hetyja nanačaścicy nie tolki dastaŭlajuć kurkumin ŭnutr rakavaj puchliny, ale i sparadžajuć vialikuju kolkaść ahresiŭnych malekuł unutry jaje kletki, jakija dapamahajuć zmahacca z rakam.
Dźvie viersii padobnych nanačaścic navukoŭcy ŭviali ŭ kultury rakavych kletak mozhu, častka ź jakich była vielmi ahresiŭnaj i stojkaj da dziejańnia radyjeterapii, a inšyja — mienš niebiaśpiečnymi raznavidnaściami raka.
Jak pakazali ekśpierymienty, usie viersii nanačaścic z dadańniem kurkumin paskarali hibiel rakavych kletak i tarmazili rost puchliny. Kurkuminavyja čaścicy, pa słovach navukoŭcaŭ, asabliva dobra dziejničali na tyja padvidy niejrabłastomy, suprać jakich chimijoterapija i radyjoterapija nie pracujuć, zabiŭšy prykładna pałovu kletak za niekalki hadzin i paskoryŭšy ich hibiel na 170%.
