Orban i Nietańjachu razam apałčylisia na Sorasa
Vizit premjer-ministra Izraila Bieńjamina Nietańjachu ŭ Budapiešt prajšoŭ na fonie ataki kiraŭnictva Vienhryi na Fond Sorasa.
Soras — miljarder-fiłantrop, jaki naradziŭsia ŭ Vienhryi i tamsama cudam uratavaŭsia ad chałakostu, tamu hetaja kraina mieła asablivaje značeńnie dla jaho. Tak, mienavita ŭ Budapiešcie jon zasnavaŭ adnu sa svaich fłahmanskich ustanoŭ — Centralnajeŭrapiejski ŭniviersitet.
Kali pravy ŭrad premjer-ministra Vienhryi Viktara Orbana ŭziaŭ pavarot na «nielibieralnuju demakratyju», suprać hetaha vystupili ŭ tym liku instytucyi, finansavanyja Sorasam i źviazanyja ź levalibieralnaj apazicyjaj. Žorstki Orban u adkaz pačaŭ kampaniju suprać Sorasa i sorasaŭcaŭ.
Dajšło da taho, što ŭ lipieni na vulicach Budapiešta ŭrad raźviesiŭ biłbordy z vyjavaj Sorasa i nadpisam «Nie daj jamu śmiajacca apošnim». U hetym mnohija pabačyli antysiemicki padtekst. Balučaja tema dla madziaraŭ: amal usie habrei krainy zhinuli ŭ kancłahierach u samym kancy vajny, paśla taho jak u sakaviku 1944 hoda ŭ krainu ŭvajšli niamieckija vojski.
Paśla pratestaŭ habrejskaj hramady biłbordy źniali. Heta nijak nie paŭpłyvała na vizit u Budapiešt premjer-ministra Izraila Bieńjamina Nietańjachu. Jon adbyŭsia 18 lipienia.
Reč u tym, što ŭ Nietańjachu z Sorasam svaje rachunki. Sorasaŭskija instytuty finansujuć u Izraili antyvajennyja arhanizacyi, libieralnyja NDA i centry abarony pravoŭ paleścincaŭ. Voś i ŭźnik aljans pravaha Orbana i pravaha Nietańjachu.
