Haradskija aktyvisty źviarnulisia da Łukašenki: Uščylnieńnie zabudovy pravakuje masavyja pratesty
Haradskija aktyvisty pieradali ŭ Administracyju prezidenta adkryty zvarot da kiraŭnika dziaržavy z prośbaj uziać na kantrol situacyju z horadabudavańniem u Minsku, piša Tut.by.
Zvarot byŭ składzieny i padpisany členami 20 inicyjatyŭnych hrup, jakija abaraniajuć roznyja rajony i kvartały stalicy ad uščylnieńnia i znosu.
U liście aktyvisty prosiać Łukašenku stvaryć pracoŭnuju hrupu dla analizu nieabchodnaści i metazhodnaści ŭščylnieńnia zabudovy Minska, «bo horadabudaŭničaja palityka, jakaja pravodzicca Minharvykankamam, viadzie da eskałacyi sacyjalnaha napružańnia i rostu niezadavolenaści siarod haradžan».
«Tak skłałasia, što hienieralny płan Minska zaćvierdžany vašym ukazam i ŭsio, što adbyvajecca ŭ horadabudaŭnictvie, prykryvajecca imiem prezidenta, — pišuć u svaim zvarocie aktyvisty. — Prajekty raźvićcia haradskich terytoryj raspracoŭvajucca biez udziełu hramadzian, uliku hramadskaj dumki, patreb miascovych žycharoŭ. Taki padychod da płanavańnia ŭ horadabudaŭnictvie ciahnie niehatyŭnyja acenki raspracavanych prajektaŭ haradžanami na hramadskich abmierkavańniach, abvastreńnie sacyjalnaj napružanaści, nieabdumanyja marnavańni biudžetnych srodkaŭ, sparadžaje ŭzłavanaść i rost niedavieru da ŭłady siarod nasielnictva».
Inicyjatyŭnyja hrupy adznačajuć, što horad pastajanna skałynajuć sacyjalnyja kanflikty ŭ suviazi ź pieraŭščylnieńniem zabudovy, znosam pryvatnaha siektara, skaračeńniem zialonych nasadžeńniaŭ, ahulnym paharšeńniem jakaści asiarodździa pražyvańnia. I ŭsio heta — nastupstvy horadabudaŭničaj palityki Minharvykankama — ličać aktyvisty. A niedapracoŭki miascovaj ułady adbivajucca niepasredna na imidžy i aŭtarytecie ŭłady.
«Hetym zvarotam my chočam pakazać, što prablema ŭščylnieńnia zabudovy maje sistemny charaktar i pravakuje masavyja pratesty zvyčajnych haradžan. Zaradziŭšysia šmat hadoŭ tamu ŭ mikrarajonie Uručča-2, uščylnieńnie stała ahulnaharadskim hałaŭnym bolem, — kaža kaardynatar inicyjatyvy «Ekahrad», pamočnik deputata Viktar Jančurevič. — Masiravanaja ataka hramadskimi abmierkavańniami PDP u siezon letnich adpačynkaŭ kaža ab stracie miascovaj uładaj instynktu samazachavańnia. Tak, siońnia ŭłada moža praihnaravać mierkavańnie hramadskaści i zaćvierdzić prajekt, ale haradžanie prademanstrujuć jašče bolšuju aktyŭnaść na etapie pačatku realizacyi prajekta, kali ŭbačać budaŭničuju techniku ŭ siabie pad voknami. Horad budujecca i raźvivajecca dla ludziej, da čaho takija rašeńni, jakija nie znachodziać padtrymki siarod nasielnictva? Horadabudaŭničaja palityka i praktyka Minska maje patrebu ŭ karekciroŭcy, na heta my źviartajem uvahu prezidenta».
Zvarot u Administracyi pryniali. Adkaz pavinny dać na praciahu 30 dzion.
