Va Ukrainie aryštavali byłoha mera Charkava Michaiła Dobkina
Piačerski rajonny sud Kijeva vybraŭ narodnamu deputatu ad «Apazicyjnaha błoka» Michaiłu Dobkinu mieru strymańnia ŭ vyhladzie ŭtrymańnia pad vartaj terminam da 14 vieraśnia z mahčymaściu ŭniasieńnia zakładu ŭ pamiery 50 młn hrn. Jak pieradaje UNIAN, adpaviednaje rašeńnie sud pryniaŭ siońnia.
UNIAN
«Prymianić da Dobkina Michaiła Markaviča… mieru strymańnia ŭ vyhladzie ŭtrymańnia pad vartaj terminam dziejańnia ŭ miežach hraničnaha terminu dasudovaha rasśledavańnia — da 14 vieraśnia 2017 hoda ŭklučna», — skazała sudździa.
Pry hetym zakład vyznačany ŭ pamiery 50 młn hrn (amal $2 młn).
13 lipienia Viarchoŭnaja Rada dała zhodu na pazbaŭleńnie deputackaj niedatykalnaści, zatrymańnie i aryšt Dobkina. Hienprakuratura bačyć u dziejańniach Dobkina prykmiety naŭmysnaj zmovy hrupy asob dla złoŭžyvańnia słužbovym stanoviščam i sadziejničańnia machlarstvu z metaj zavałodańnia 78 ha ziamli ŭ Charkavie narmatyŭnym koštam bolš za 220 młn hrn (kala $8,5 młn).
Dobkin adchilaje ŭsie abvinavačvańni i zapeŭnivaje, što Charkaŭski harsaviet nie prymaŭ supraćzakonnych rašeńniaŭ, kali jon byŭ meram horada. 14 lipienia Dobkinu ŭručyli apaviaščeńnie ab padazreńni. Prakurory prasili sud pryznačyć Dobkinu mieru strymańnia ŭ vyhladzie zaklučeńnia pad vartu z alternatyvaj załohu ŭ pamiery nie mienš za 150 młn hrn (amal $5,8 młn).
