JESPČ padtrymaŭ zabaronu na našeńnie parandžy ŭ Bielhii
Jeŭrapiejski sud pa pravach čałavieka pryznaŭ, što ŭviedzienaja ŭ Bielhii zabarona na našeńnie parandžy nie parušaje pałažeńniaŭ Jeŭrapiejskaj kanviencyi, piša VVS.
Reuters
Zhodna z rašeńniem JESPČ, zabarona adpaviadaje normam demakratyčnaha hramadstva i jaje možna razhladać u jakaści adnoj z važnych «umoŭ sumiesnaha pražyvańnia», jakoje nakiravanaje «na abaronu pravoŭ i svabod inšych hramadzian».
U JESPČ źviarnulisia try žycharki Bielhii, jakija nastojvali na tym, što zabarona na našeńnie musulmanskaha adzieńnia, jakoje całkam zakryvaje tvar, parušaje ich pravy. Dźvie ź ich patrabavali pryznać ahulnanacyjanalnuju zabaronu na našeńnie parandžy parušajučaj ich pravy.
Abiedźvie žančyny adstojvali svajo prava źjaŭlacca ŭ hramadskich miescach u nikabie — musulmanskim žanočym hałaŭnym ubory, jaki zakryvaje tvar, z vuzkim prarezam dla vačej. Ahulnanacyjanalny zakon sprabavali asprečyć u Strasburhu žycharka horada Scharbiek hramadzianka Bielhii Samija Biełkasem i hramadzianka Maroka Jamina Asar, jakaja žyvie ŭ horadzie Ljež.
Biełkasem pryznałasia, što paśla ŭviadzieńnia zabarony pierastała nasić nikab praz aściarohi, što jaje mohuć aštrafavać ci pasadzić u turmu. Asar paličyła za lepšaje zusim nie vychodzić na vulicu, kab vykanać relihijnyja pradpisańni i nie parušyć zakonaŭ krainy.
Jašče adna žančyna — bielhijka Fozija Dakir — paskardziłasia na anałahičnyja zabarony, uviedzienyja tryma bielhijskimi municypalitetami jašče ŭ 2008 hodzie.
Bielhija ŭviała ahulnanacyjanalnuju zabaronu na našeńnie ŭ hramadskich miescach hałaŭnych uboraŭ, całkam abo častkova zakryvajuć tvar, u 2011 hodzie — «ź mierkavańniaŭ biaśpieki». Jašče da ŭviadzieńnia ahulnanacyjanalnaj zabarony, u 2008 hodzie, zabaranić našeńnie parandžy vyrašyli ŭłady niekalkich municypalitetaŭ (Piepienster, Dyzon i Vervje).
JESPČ pryjšoŭ da vysnovy, što ahulnanacyjanalnaja zabarona nie parušaje pravy na pavahu pryvatnaj i siamiejnaha žyćcia, prava na svabodu vykazvańnia dumki, sumleńnia i relihii (art. 8-9 Kanviencyi pa pravach čałavieka). Taksama sud nie vyjaviŭ parušeńniaŭ art. 14 (zabarona dyskryminacyi).
Za apošnija niekalki hadoŭ šerah jeŭrapiejskich krain uviali abmiežavańni na našeńnie ŭ hramadskich miescach žanočaha musulmanskaha adzieńnia. Francyja ŭ 2011 hodzie stała pieršaj jeŭrapiejskaj krainaj, jakaja aficyjna zabaraniła nasić parandžu i inšaje padobnaje adzieńnie ŭ hramadskich miescach.
U tym ža hodzie zabarona była ŭviedzienaja ŭ Bielhii, a ŭ vieraśni 2016 hoda anałahičny zakonaprajekt uchvaliła nižniaja pałata parłamienta Šviejcaryi.