Minski himnazist sabraŭ kamandu i ahučvaje pa-biełarusku «Čarapašak-nindzia» VIDEA
17-hadovy Dźmitryj Astroŭski, navučeniec 21-j himnazii Minska, arhanizavaŭ u siabie doma studyju pa ahučcy multfilmaŭ na biełaruskaj movie. I treba zaŭvažyć, pa amatarskich mierkach ahučka atrymlivajecca davoli jakasnaj.
«Kanapa Project byŭ stvorany ŭ 2015 hodzie, — raspaviadaje Dźmitryj — U mianie było žadańnie zrabić svoj uniosak u papularyzacyju biełaruskaj movy, i ja vyrašyŭ zrabić heta praz mulciki. Dziela hetaha z-za miažy zamoviŭ admysłovy prafiesijny mikrafon, kab huk byŭ jak maha bolš jakasny i hledaču było pryjemna hladzieć i słuchać».
Nazva «kanapa» była vybranaja tamu, što treba było padabrać takoje biełaruskaje słova, kab jaho było prosta vymaŭlać navat niebiełaruskamoŭnamu čałavieku i kab jano dobra vyhladała ŭ tranślitaracyi.
«Z samaha dziacinstva lubiŭ multsieryjał «Čarapaški-nindzia», tamu abraŭ mienavita jaho, — praciahvaje raskaz Dźmitryj. — Siarod dziaciej zaraz vielmi papularnaja sučasnaja viersija hetaha multfilma. U vyniku ja spačatku ahučyŭ trejler i pačaŭ raspaŭsiudžvać jaho pa roznych supołkach. Ludzi pačali prapanoŭvać svaju dapamohu ŭ pierakładzie, ahučcy. Vielmi časta kazali, što buduć pakazvać multfilm svaim dzieciam. Usio heta mianie natchniła. Ja zrazumieŭ, što sapraŭdy hetym varta zajmacca. Pieršuju sieryju pierakładaŭ sam, tamu byli nievialikija pamyłki. Ahučvaŭ usich piersanažaŭ tolki svaim hołasam. Paśla raspaŭsiudu ŭ internecie svaju dapamohu ŭ pierakładzie mnie prapanavaŭ vypusknik linhvistyčnaha ŭniviersiteta Leŭ Hłušycki, jaki prafiesijna pierakłaŭ druhuju i treciuju sieryi. Naprykład, my nie viedali, jaki pierakład zrabić dla słovazłučeńnia stupid freak. Dakładny jaho pierakład — «tupaja pačvara». My ž vyrašyli krychu źmiakčyć hetaje słova, i ŭ vyniku atrymałasia «strachoćcie chadziačaje». Pačynajučy z druhoj sieryi, udzieł u ahučcy ŭziaŭ Pavał Klok, jakoha prapanavaŭ Alaksandr Šumski. Dzie-jakija žanočyja roli dapamahała ahučvać maja maci».
Paśla ahučki i raspaŭsiudu pieršaj sieryi na niekatory čas chłopiec byŭ zakinuŭ prajekt. Ale zaraz vyrašyŭ adnavić spravu, bo adčuvaje vialikuju padtrymku ad tych, kamu heta sapraŭdy patrebna.
«U pačatku leta mnie va «UKantakcie» napisaŭ administratar supołki «KinaKipa» Michaił Karalevič i prapanavaŭ padtrymać prajekt nievialikimi hrašyma, kab sieryi vychodzili i dalej. Chacia ja i rablu heta nie dziela hrošaj, ale hetaja padtrymka Michaiła padšturchnuła mianie praciahnuć rabić maju spravu. Ja liču što toje, što my robim, — heta dobra, heta sapraŭdy patrebna Biełarusi i tym biełaruskamoŭnym dzieciam, jakija chočuć hladzieć mulciki na rodnaj movie. Ciapier ja ŭžo dakładna viedaju, što nie zakinu prajekt, bo pra jaho daviedałasia vielmi šmat ludziej».
U bližejšych płanach Dźmitryja Astroŭskaha — ahučyć całkam chacia b adzin siezon multsieryjała.
My žadajem chłopcu i jaho kamandzie pośpiechaŭ i prapanujem vam pahladzieć uryvak z treciaj sieryi multsieryjała «Čarapaški-nindzia»:
