StopSpam: jak pazbavicca ad nadakučlivych rekłamnych sms?
Napeŭna, kožnaha z nas kali-nikali razdražniaŭ rekłamny spam, jaki syplecca z usich «dzirak». I kali na vulicach my jaho chutka minajem, ad fłajera možam admovicca, ad e-mail-rassyłki adpisacca (prynamsi, heta ŭ praviłach dobraha tonu), to voś z sms nie zaŭsiody tak prosta: numar spamiera schavany, na sajcie infy niama — što rabić?
U jakaści adkazu na takoje šyrokaje i fiłasofskaje pytańnie my padrychtavali dla vas nievialikuju instrukcyju, jakaja dapamoža pačyścić telefon ad niepatrebnaha kantentu.
Pačniom z matčastki.
Jakimi zakonami ŭ Biełarusi rehulujecca spam?
Raspaŭsiudžvańnie rekłamy pry dapamozie telefonnaj, teleksnaj, faksimilnaj, sotavaj ruchomaj elektrasuviazi dy elektronnaj pošty rehłamientujecca 12-m artykułam Zakona «Ab rekłamie».
Aproč taho, jość Praviły akazańnia pasłuh elektrasuviazi, zaćvierdžanyja ŭradavaj pastanovaj №1055 jašče ŭ žniŭni 2006 hoda. Ministerstva suviazi i infarmatyzacyi raspracavała źmieny ŭ hetuju pastanovu, ale jany pakul nie zaćvierdžanyja.
Što ŭ zakonach jość pa temie?
Nichto ničoha nie moža dasyłać na asabisty numar biez vašaha panskaha dazvołu. Kali abanient u piśmovaj damovie daje zhodu na atrymańnie rekłamy, jaho pavinny prainfarmavać i pra mahčymaść nieadkładnaha spynieńnia raspaŭsiudu rekłamy na jahony adras. Takuju mahčymaść abaviazany prapisvać ŭ damovie.
Jakija orhany kantralujuć vykanańnie zakona?
Pierš za ŭsio, dziaržaŭny kantrol u halinie rekłamy ažyćciaŭlajecca Ministerstvam antymanapolnaha rehulavańnia i handlu, miascovymi vykanaŭčymi i rasparadčymi dy inšymi dziaržaŭnymi orhanami ŭ miežach ich kampietencyi.
Takim čynam, što rabić, kali vas dapiakajuć spamam?
1. Kali heta apieratary mabilnaj suviazi:
MTS raić dadać pasłuhu admovy ad hałasavoj rassyłki i sms-rekłamy, skarystaŭšysia ahulnym numaram 0890: nazyvajecie svoj numar telefona, imia uładalnika — i pasłuha aktyvujecca. Naturalna, biaspłatna.
«Vełkom» prapanoŭvaje źviartacca ŭ lubyja firmovyja ofisy i pisać tam śpiecyjalnuju zajavu. Abanient taksama moža patelefanavać u daviedkavuju słužbu i paprasić zabłakavać niepatrebnyja rassyłki. Kali ŭ vas jość asabisty kabiniet, to adklučyć niepatrebnyja pasłuhi mahčyma na sajcie.
«Łajf» u takich vypadkach padkazvaje źviartacca ŭ infarmacyjna-daviedkavuju słužbu — śpiecyjalist, jaki zdymie słuchaŭku, zafiksuje admovu ad rassyłki. Jość i jašče adzin varyjant: uvieści zapyt *120#, dalej nacisnuć dziaviaty punkt mieniu «Nałady», abrać rekłamu ŭ sms i zvankach i adklučyć jaje.
2. Kali heta niejkija «levyja» kampanii, naviny jakich vam da lampački:
Akramia mahčymaści adpravić peŭny numar u čorny śpis i zabłakavać (kali jon adlustroŭvajecca), jość niekalki varyjantaŭ. Tak by mović, dla dobrych i złych palicejskich.
Pieršy: telefanujecie ŭ kampaniju, u łapy jakoj adnojčy trapiŭ vaš numar telefona, i prosicie prybrać vas z bazy (taki scenar moža adbycca z kožnym, chto chacia b adnojčy zakazaŭ ježu, taksi ci kaśmietyku i takim čynam trapiŭ u siektu). Adekvatnaje kiraŭnictva adrazu pojdzie nasustrač. Mienavita tak zrabili servis pa dastaŭcy ježy «Jołki-pałki», kampanii «Fabierlik» i «Miłavica», jakim my telefanavali ŭ jakaści ekśpierymientu.
Inšy šlach «razborak» praduhledžany zakonam: vam treba źviarnucca da svajho apieratara suviazi sa skarhaj na dziejańni abanienta ci karystalnika, jaki vas turbuje. Skarhi mohuć nakiroŭvacca jak u vusnaj, tak i ŭ piśmovaj formie. Apieratar sam abaviazany raźbiracca z tym, chto vas paniepakoiŭ. Adnak, jak raskazaŭ «NN» juryst Viačasłaŭ Dryzhałovič, jaki ŭ svajoj praktycy sutykaŭsia z padobnymi vypadkami, pravavaja niepiśmiennaść apierataraŭ suviazi nie zaŭsiody dazvalaje adekvatna i chutka vyrašyć takija pytańni.
3. Kali nie atrymlivajecca pa-dobramu:
Z zajavaj pra ździajśnieńnie ŭ dačynieńni da vas pravaparušeńnia (tak-tak, heta ličycca administracyjnym parušeńniem) treba źviarnucca ŭ svoj vykankam pa miescy rehistracyi. Parušeńnie zakanadaŭstva ab rekłamie ciahnie nakładańnie štrafu ŭ pamiery ad 5 da 30 bazavych vieličyń, na indyvidualnaha pradprymalnika — ad 10 da 40 bazavych vieličyń, a na jurydyčnuju asobu — ad 20 da 50 bazavych vieličyń. I heta sapraŭdy pracuje!
Uvohule ž, kab vam nie daviałosia karystacca paradami z hetaha artykuła, budźcie pilnymi. Niaredka ludzi sami pakidajuć pryvatnyja telefonnyja numary i elektronnuju poštu ŭ adkrytym dostupie (u abjavach ci na staronkach u sacsietkach), a potym ździŭlajucca, jak trapili ŭ čarhovuju bazu rassyłki. Svoječasova prybirajcie ich adtul, kali niama žadańnia być zaspamlenymi, i nie zabyvajciesia pra mahčymaść nałady piersanalnych paramietraŭ niepažadanaj pošty.
Aŭtar dziakuje jurystu Viačasłavu Dryzhałoviču i načalniku siektara kaardynacyi ŭzajemadziejańnia i ekspłuatacyi sietak Ministerstva suviazi Natalli Kručkovaj za dapamohu ŭ padrychtoŭcy artykuła.
