Ukrainskaja siamja, jakaja pryjechała ŭ Hiermaniju pad vyhladam siryjcaŭ, padała ŭ sud na ŭłady
Siamja z Ukrainy, jakaja, vydaŭšy siabie za siryjcaŭ, atrymała status biežancaŭ u FRH, padała skarhu ŭ niamiecki sud z-za admieny rašeńnia paśla vykryćcia padmanu, paviedamlaje DW sa spasyłkaj na Die Welt. Razhlad spravy pačynajecca ŭ Miunstery 26 červienia.
Pavodle danych vydańnia, ukraincy zajechali ŭ Hiermaniju ŭ vieraśni 2014 hoda i padali prašeńnie ab pradastaŭleńni prytułku. U sakaviku 2015 Fiederalnaje viedamstva pa spravach mihracyi i biežancaŭ uchvaliła prašeńnie, jakoje było razhledžanaje ŭ piśmovym vyhladzie, biez praviadzieńnia asabistaj hutarki.
Padman vyjaviŭsia paśla taho, jak siamja prybyła ŭ prytułak dla biežancaŭ i pačała z honaram raspaviadać pra toje, jak im udałosia atrymać status, nie viedajučy ni adnaho słova na arabskaj movie. Hetaja infarmacyja dajšła da viedamstva, i ŭ krasaviku 2016 hoda rašeńnie ab pradastaŭleńni statusu biežancaŭ było anulavanaje.
Ukraincy padali skarhu na dziejańni niamieckich uładaŭ u sud. Jany spasyłajucca na isnujučy ŭ pravavoj sistemie Hiermanii pryncyp abarony zakonnych čakańniaŭ. Prafiesar pa publičnym pravie Fabijan Vitrek sumniavajecca, što ŭkrainskaj siamji ŭdasca skarystacca jurydyčnaj ščylinaj, bo pieršapačatkova byli padadzienyja łžyvyja źviestki, zajaviŭ jon u intervju Die Welt.
Drukujecca ŭ miežach śpiecyjalnaj rubryki «Naviny Hiermanii»
