MNS prosić nie pierazvońvać pry atrymańni sms-papiaredžańniaŭ
U aŭtorak 20 červienia niekalki miljonaŭ biełarusaŭ atrymali SMS ad Ministerstva nadzvyčajnych situacyj z papiaredžańniem pra mocny viecier. Adnak zamiest padziaki MNS sutyknułasia z žorstkaj krytykaj niekatorych ludziej.
«Pieršyja hadziny paśla rassyłki telefonnyja linii staličnaha MNS byli pierahružanyja pustymi zvankami nakont tych SMS, — raspavioŭ «Našaj Nivie» Vital Demboŭski, namieśnik načalnika minskaha haradskoha ŭpraŭleńnia MNS. — Ludzi sapraŭdy zvanili, kab zadać pytańnie ci vykazać abureńnie. Ale kali čałaviek atrymlivaje sms z papiaredžańniem pra nadvorje, to nie treba zvanić u MNS, kab padzialicca svaim mierkavańniem. Numar 101 isnuje vyklučna dla ekstrannaha paviedamleńnia ab nadzvyčajnaj situacyi albo pahrozie žyćciu i zdaroŭju ludziej; u toj momant, kali linii pierahružanyja zvankami na staronnija temy, kamuści moža spatrebicca realnaja dapamoha, i jon paprostu nie zmoža apieratyŭna datelefanavacca. Prośba ŭličvać hety faktar i nie telefanavać prosta tak. Kab udakładnić lubyja pytańni datyčna dziejnaści Ministerstva, isnuje zakon ab zvarotach hramadzian, u adpaviednaści ź jakim možna źviarnucca piśmova albo praz elektronnuju formu na našym sajcie».
Da taho ž, varta adznačyć, što rassyłka SMS z papiaredžańniami biaspłatnaja. MNS ničoha nie płacić mabilnym apierataram.