U Čačni zakryli spravu suprać Murada Amryjeva
Spynieny kryminalny pieraśled čempijona śvietu MMA pa viersii World Mixed Martial Arts Federation Murada Amryjeva. Pra heta paviedamlaje Tut.bysa spasyłkaj na pres-słužbu MUS pa Čačenskaj Respublicy.
Fota: Kanstancin Husieŭ/Facebook
«Daznaŭcam OP-3 UMVD RF pa h. Hrozny ŭ adpaviednaści z p. 3 č. 1 art. 24 KPK RF 14 červienia biahučaha hoda vyniesienaja pastanova ab spynieńni kryminalnaj spravy (kryminalnaha pieraśledu), raspačataj pa č. 3 art. 327 KK RF, pa jakoj Murad Amryjeŭ prachodziŭ u jakaści padazravanaha», — havorycca ŭ paviedamleńni.
Murada Amryjeva Biełaruś pieradała Rasii 8 červienia, patłumačyŭšy heta tym, što spartsmien znachodzicca ŭ miždziaržaŭnym vyšuku za vykarystańnie padroblenych dakumientaŭ; pavodle danych Kamiteta pa praduchileńni katavańniaŭ, padstavaj dla hetaha stała pamyłka druku ŭ jaho pašparcie.
Sam Amryjeŭ śćviardžaŭ, što jaho pieraśledujuć z-za brata, jakoha padazrajuć u zamachu na vysokapastaŭlenaha supracoŭnika MUS.
Nie vydavać Amryjeva Rasii prasili baćki Murada i pravaabaroncy. Videazvarot z takoj ža prośbaj da Alaksandra Łukašenki zapisała Ksienija Sabčak. Usie jany kazali, što ekstradycyja ŭ Čačniu niasie śmiarotnuju pahrozu dla spartsmiena.
Paśla taho jak Amryjeva dastavili ŭ Čačniu, jaho dapytali pa spravie ab vykarystańni zahadzia padroblenaha pašparta i vyzvalili pad padpisku ab niavyjeździe.
«Ciapier ja ź siamjoj, u nas usio ŭ paradku. Z taho času, jak mianie pieradali palicyjantam, nichto da mianie siłu nie ŭžyvaŭ i słovam nie pakryŭdziŭ. Viadoma, usia hetaja situacyja była vielizarnym stresam dla mianie. Jana parušyła maje i spartyŭnyja płany, i žyćciovyja, ale nijakaj pahrozy ciapier niama ni dla mianie, ni dla siamji. Heta ja vam kažu ščyra, bieź jakoha-niebudź cisku», — raspavioŭ Amryjeŭ na pres-kanfierencyi paśla vyzvaleńnia.
