U Baranavičach pačynajecca nabor u biełaruskamoŭny kłas
U novym navučalnym hodzie ŭ adnoj sa škoł horada moža adkrycca biełaruskamoŭny 1-y kłas. Ci źjavicca jon naohuł i na bazie jakoj z ustanoŭ adukacyi raźmieścicca, zaležyć ad kolkaści achvotnych vučycca na rodnaj movie.
Siońnia ŭ Baranavičach jość adziny biełaruskamoŭny kłas — u himnazii №4. Jon byŭ stvorany pa inicyjatyvie baćkoŭ i spačatku isnavaŭ u siaredniaj škole №14.
U hetym hodzie adździeł adukacyi, sportu i turyzmu Baranavickaha harvykankama vyrašyŭ nabrać pieršakłaśnikaŭ u biełaruskamoŭny kłas, adkryćcio jakoha płanujecca ŭ škole №13.
— Viedaju sa svajho dośviedu, što biełaruskamoŭnyja kłasy — niešmatlikija. Tamu stvarać ich u pierapoŭnienych škołach budzie nieracyjanalna. Tym bolš što ŭ našym horadzie jość ustanovy adukacyi, dzie kolkaść vučniaŭ dazvalaje adkryć taki kłas, — tłumačyć Siarhiej Puzikaŭ, načalnik adździeła adukacyi, sportu i turyzmu Baranavickaha harvykankama.
Adnak baćki, jakija chočuć, kab ich dzieci vučylisia na rodnaj movie, ličać, što biełaruskamoŭny kłas pavinien źjavicca ŭ prestyžnaj navučalnaj ustanovie — u adnoj z baranavickich himnazij. I pažadana, kab ustanova raźmiaščałasia ŭ centry horada, kudy mohuć dabracca vučni z roznych mikrarajonaŭ.
Siarhiej Puzikaŭ adznačaje, što stvaryć biełaruskamoŭny kłas mahčyma i ŭ himnazii. Ale dla hetaha treba sabrać poŭny kłas — 26 vučniaŭ. Dla stvareńnia biełaruskamoŭnaha kłasa na bazie, naprykład, škoły №13, dastatkova 5—7 achvotnych.
Žycharka horada Viktoryja Jermalenka — adna z tych, chto choča, kab jaje dačka vučyłasia ŭ biełaruskamoŭnym kłasie.
— Ja sama karystajusia dźviuma movami — ruskaj i biełaruskaj. I, na moj pohlad, vałodańnie nie tolki ruskaj, ale i biełaruskaj movaj vielmi karysna. Da taho ž biełaruskaja mova dazvalaje spaścihnuć mientalnyja momanty našaj kultury, — tłumačyć Viktoryja.
Dačka Viktoryi ciapier chodzić u ruskamoŭnuju hrupu sadka, ale raz na tydzień u ich pravodziać biełaruskamoŭny dzień. Dziaŭčynka ŭžo čytaje pa-biełarusku, a kali čahości nie razumieje, pytajecca ŭ maci.
— Ja nie dumaju, što ŭ dački buduć prablemy ŭ znosinach z adnahodkami z-za biełaruskamoŭnaha navučańnia. Naadvarot, heta pieravaha, tamu što dzicia budzie adnolkava dobra viedać ruskuju i biełaruskuju movy, — ličyć Viktoryja Jermalenka.
Usie, chto žadaje, kab jaho pieršakłaśnik navučaŭsia pa-biełarusku, z 2 červienia pa 28 žniŭnia mohuć napisać zajavu padčas padačy dakumientaŭ u navučalnuju ŭstanovu.
Adnak pradstaŭniki Baranavickaj arhanizacyi Tavarystva biełaruskaj movy, jakija vystupali inicyjatarami stvareńnia biełaruskamoŭnaha kłasa ŭ našym horadzie, prapanujuć stvaryć baćkoŭski kamitet. Taki kamitet, jak ličyć Taćciana Małaščanka, staršynia kamisii pa vykarystańni biełaruskaj movy i adukacyi Baranavickaj haradskoj arhanizacyi Tavarystva biełaruskaj movy, dazvolić abjadnać baćkoŭ i kalektyŭna vykazać svaje intaresy.
Achvotnych prosiać patelefanavać pa numarach: 41-65-65, 8 (029) 723-53-60 da 1 červienia.
Siem plusaŭ navučańnia pa-biełarusku:
1. Jakasny dahlad dziaciej: pavyšanaja ŭvaha da nievialikaj hrupy dzietak budzie spryjać lepšamu vychavańniu i raźvićciu.
2. Dazvalaje svabodna vałodać ruskaj i biełaruskaj movami.
3. Raźvivaje zdolnaść da vyvučeńnia zamiežnych movaŭ.
4. Stvaraje asiarodździe adnahodak, jakija karystajucca biełaruskaj movaj. A heta spryjaje vychavańniu sučasnaha biełarusa, zdolnaha kankuryravać u šmatnacyjanalnym i šmatmoŭnym śviecie.
5. Vyłučaje vaša dzicia siarod inšych.
6. Raźvivaje kamunikabielnaść: papieramiennaje znachodžańnie ŭ roznych moŭnych asiarodkach zdymaje barjery ŭ kantaktach z roznymi ludźmi.
7. Stvaraje lepšyja ŭmovy dla kankurencyi za pracoŭnaje miesca: usio čaściej patrabujucca ludzi z vałodańniem dźviuch dziaržaŭnych moŭ.