Prezientacyja knihi Michała Aniempadystava «Koler Biełarusi» adbudziecca 30 traŭnia
Doŭhačakanaja prezientacyja knihi mastaka i dyzajniera Michała Aniempadystava «Koler Biełarusi» adbudziecca ŭ pieradapošni dzień viasny. Latučy ŭniviersitet zaprašaje ŭsich zacikaŭlenych 30 traŭnia ŭ 19.30 u halereju Biełaruskaha sajuza dyzajnieraŭ.
Z daśledavańniem «Koler Biełarusi» ŭ farmacie vystavy i zajmalnych lekcyj cikaŭnyja da biełaruskaj kultury znajomyja daŭno. Ciapier šmathadovaja daśledčyckaja praca Michała Aniempadystava ŭvasobiłasia ŭ knihu — šykoŭny dyzajnierski albom.
«Vizualnyja materyjały kožnaha z raździełaŭ: «Bieły», «Čorny», «Čyrvony», «Sini. Błakitny», «Šery», «Załaty. Žoŭty», «Zialony» supravadžajuć razhornutyja aŭtarskija teksty. Heta ekskursy ŭ kulturałohiju koleraŭ. Kožny koler pradstaje jak pradukt kultury, dla jakoha na peŭnym etapie historyi źjaŭlajecca adpaviednaja nazva, uvasablajučy jahony znakavy sens, simvaličnuju infarmacyju, markiornyja funkcyi», — raspaviadaje doktar mastactvaznaŭstva, dacent katedry etnahrafii i falkłoru BDUKM Volha Łabačeŭskaja, recenzient hetaj daśledčyckaj pracy.
Fiłosaf, litaratar i redaktar knihi Valancin Akudovič aznačaje jaje tak: «Kali b mianie paprasili adnym słovam acharaktaryzavać knihu Michała, dyk hetym słovam było b «Patrebnaja». Mnie jana bačycca nadzvyčaj patrebnaj knihaj dla ŭsich, chto choča zahłybicca ŭ samuju sutvu Biełarusi praz historyju jaje koleraŭ. I ja peŭny, što balšynia čytačoŭ adkryje dla siabie novy śviet, pra isnavańnie jakoha navat nie zdahadvałasia, niahledziačy na ŭsie svaje ŭniviersitety».
Latučy ŭniviersitet zaprašaje dałučycca da imprezy, zadać pytańni aŭtaru i ekśpiertam 30 traŭnia (aŭtorak) u 19.30 u halerei Biełaruskaha Sajuza Dyzajnieraŭ (Bryleŭskaja, 14). Uvachod volny!
Kniha Michała Aniempadystava «Koler Biełarusi» vydadzienaja ŭ miežach Mižnarodnaha prajekta pa raźvićci kulturnaj spadčyny CHOICE.
Dadatovaja infarmacyja pa telefonach: +375297422040 (Julija), +375447424832 (Lizavieta).
Bolš publikacyj na temu daśledavańnia «Koler Biełarusi» šukajcie na sajcie www.fly-uni.org
