Mytniki try miesiacy buduć pravodzić ekśpierymient u Kazłovičach. Abiacajuć skaracić čas na miažy
Supracoŭniki mytni buduć vykonvać niekatoryja abaviazki pamiežnikaŭ na praciahu troch miesiacaŭ. Taki ekśpierymient pačniecca ŭ punkcie propusku «Kazłovičy» na miažy z Polščaj 1 červienia. Pra heta paviedamlaje sajt mytnaha kamiteta
Z 1 červienia pa 1 vieraśnia ŭ mižnarodnym aŭtadarožnym punkcie propusku «Kazłovičy» mytniki voźmuć na siabie častku abaviazkaŭ pamiežnikaŭ. Supracoŭniki mytni spasyłajucca na prezidencki ŭkaz № 179 ad 23 maja 2017 hoda.
Mytniki buduć praviarać dakumienty fizičnych asob, zachavańnie zamiežnymi hramadzianami i asobami biez hramadzianstva praviłaŭ znachodžańnia ŭ Biełarusi i praviłaŭ tranzitnaha prajezdu praz našu krainu.
Taksama mytniki buduć pravodzić sanitarna-karancinny kantrol fizičnych asob, praviarać u kiroŭcaŭ dakumienty ab abaviazkovym strachavańni hramadzianskaj adkaznaści ŭładalnikaŭ transpartnych srodkaŭ.
Dla ekśpierymientu 66 supracoŭnikaŭ Bresckaj mytni vučylisia ŭ centry padrychtoŭki śpiecyjalistaŭ pahrankantrolu ŭ Instytucie pahransłužby.
Biełaruskija mytniki adznačajuć, što funkcyi mytnaha i pahrankantrolu sumiaščajuć u pieradavoj suśvietnaj praktycy. Dla dadzienaha ekśpierymientu vyvučali dośvied Finlandyi.
Novy miechanizm dazvolić pracavać pa pryncypie «adno akno»: usie dakumienty treba budzie pradastaŭlać mytniku, pry hetym skarocicca čas na kantrol u punkcie propusku, vyklučać dublavańnie niekatorych funkcyj.
