U Rasii jepiskapu padaryli Land Cruiser za $100 tysiač. RPC: «Isus taksama prymaŭ darahija padarunki»
Pradstaŭnik Arłoŭskaj mitrapolii biskup Niektaryj (u śviecie Mikałaj Vasiljevič Sielaźnioŭ) abzavioŭsia aŭtamabilem Land Cruiser rynkavym koštam kala 6 miljonaŭ rasijskich rubloŭ (prykładna $106 tysiač). Na transpartnym srodku taksama ŭstanoŭlenaja elitnaja sieryja numaroŭ, asacyjavanaja z rehijanalnym uradam, piša TJournal sa spasyłkaj na «Otkrytuju Rośsiju».
openrussia.org
Krynicy ŭ mitrapolii, na jakija spasyłajecca «Otkrytaja Rośsija», ździvilisia źjaŭleńniu ŭ jepiskapa darahoha aŭtamabila. Pradstaŭniki duchavienstva vykazali zdahadku, što jepiskap moh sam kupić sabie mašynu, ale ŭsumnilisia ŭ krynicy jaho dachodaŭ.
Aficyjny pradstaŭnik Arłoŭskaj mitrapolii Jaŭhien Barysaŭ zajaviŭ, što Land Cruiser byŭ padorany jepiskapu adnym ź miascovych ahrachołdynhaŭ, i źviazany z archijerejskim słužeńniem śviatara, jaki «naviedvaje samyja addalenyja vioski ŭ luby čas hoda i ŭ luboje nadvorje».
«Nijakaj prajavy sknarnaści ŭ hetym niama. Sam Isus Chrystos nasiŭ darahoje adzieńnie, jakoje daryli jamu, skažam tak, tyja ludzi, jakija jaho šanavali. Mnohija śviatyja toje ž samaje prymali», — prakamientavaŭ jon.
Barysaŭ skazaŭ na zakančeńnie, što da padobnych rečaŭ nieabchodna padychodzić razumna, a nie čaplacca da ich abo davodzić da absurdu.
U 2012 hodzie patryjarch Kirył zaklikaŭ śviataroŭ admovicca ad darahich mašyn, bo tyja pravakujuć niehatyŭnuju hramadskuju dyskusiju i dyskredytujuć duchavienstva. Nad vypadkami, kali darahi transpartny srodak słužycielam carkvy chočuć kupić «sponsary», patryjarch rekamiendavaŭ «dvaccać razoŭ padumać».
